Buxoroda 2021-yilning 25—27-iyun kunlari “Yangi O‘zbekiston yoshlari, birlashaylik!” shiori ostida yoshlar festivali bo‘lib o‘tdi. Festival 22 ta loyihani o‘z ichiga qamrab oldi. Mazkur festivalda ishtirok etgan “Daryo” muxbiri tadbirning e’tiborga molik lahzalarini suratga oldi.
Yoshlar ishlari agentligining viloyat boshqarmasi axborot xizmati rahbari Zarnigor Shukurovaga ko‘ra, uch kun davom etgan festivalda 400 mingdan ortiq yigit-qiz qatnashgan.
Festivalning “Sportni sev — sport bilan yasha!” deb nomlangan ilk loyihasi viloyatning barcha tuman va shaharlarida amalga oshirilib, mutasaddi rahbarlar hamda yoshlar jalb etildi.
“Karvon yurishi” loyihasida esa davlat bayrog‘i Buxoro shahrining markaziy ko‘chalari bo‘ylab aylantirildi. “O‘zbekiston yoshlari 30 yil” yozuvi shakllantirildi.
Festivalning ochilishida bo‘lib o‘tgan “Ark” qo‘rg‘onidagi gala-konsertda 30 mingdan ortiq yoshlar qatnashdi.
Labi Hovuz majmuasidagi “Rahbar va yoshlar” uchrashuvida yosh jurnalist hamda blogerlar, shuningdek, faol loyiha ishtirokchilari hamda innovatsion loyihalar g‘oliblari pul mukofotlari hamda qimmatbaho sovrinlar bilan taqdirlandi.
“Hech kim mehr va e’tibordan chetda qolmas” loyihasida Samandar Hamroqulov kuylab, o‘ksik qalbli bolajonlarni xursand qildi.
Qorako‘lda o‘tkazilgan “Rahbar va yoshlar uchrashuvi”da esa tuman hokimi Sherali Salomov qorako‘llik 79 nafar bitiruvchini oltin medal bilan taqdirladi.
Yoshlar festivalining Buxoroda bo‘lib o‘tishi rejalashtirilgan yakuniy marosimidagi gala-konsert pandemiya kuchaytirilgani bois qoldirildi.
Izoh (0)