O‘zbekistondan Qozog‘istonga meva-sabzavot karvoni jo‘natiladi. Qozog‘iston savdo va integratsiya vazirining ishchi tashrifi shu kabi natija bilan yakunlangan. Bu haqda Forbes Kazakhstan nashriga tayanib, “Gazeta.uz” xabar berdi.
“Yetti kun ichida qariyb 2 ming kilometr yo‘l bosdik, turli mahsulotlarni sinov tariqasida yetkazib berish bo‘yicha 3 million dollarlik shartnoma imzoladi, bir nechta kooperatsion loyihalarni amalga oshirishga kelishib oldik va qator yo‘nalishlar bo‘yicha hamkorlik rejalari belgilandi: agrosanoat kompleksi, yengil sanoat, mashinasozlik, elektr energetika…”, — deb yozadi vazir o‘zining Facebook’dagi sahifasiga.
Uning so‘zlariga ko‘ra, Toshkent hokimi bilan sanoat kooperatsiyasi bo‘yicha kelishuvga erishilgan, xususan, Qozog‘istonning transformator ishlab chiqaruvchi Alageum Electric kompaniyasini ochish masalasi ko‘rib chiqilmoqda.
Baxit Sultonovning ta’kidlashicha, tashrif davomida Qozog‘iston delegatsiyasi “dalalar va bog‘lar, bozorlar va agrologistik markazlarga borgan, transport koridorlari va savdo bozorlari yo‘lidagi to‘siqlar haqida so‘ragan, fermerlar, savdogarlar, viloyat rahbarlari bilan ko‘plab uchrashuvlar o‘tkazilgan”.
“Biz muhokama qilgan eng muhim narsa: tovar aylanmasi koridori yaqinida yaratiladigan logistik markazlarda nafaqat kalibrlash va saralashni, balki to‘g‘ri qadoqlashni tashkil qilish masalasini ham hal qilish zarur. Katta chakana savdo tarmoqlari qadoqlash borasida juda qattiq talablarga ega, ularsiz hatto juda yaxshi mahsulot hech qachon peshtaxtalardan joy olmaydi”, — deydi u.
Qozog‘iston vaziri tashrifning so‘nggi ikki kunida ikkita shartnoma imzolanganini ma’lum qilgan. Birinchisi — o‘zbek gilosini xarid qilish bo‘yicha 500 ming dollarlik shartnoma bo‘lib, uning doirasida “shartnoma imzolagan Qozog‘iston kompaniyasi o‘zbek va qozoq gilosining katta partiyasini keyinchalik Dubaydagi chakana savdo tarmoqlariga yetkazib berish bilan yig‘ishni rejalashtirmoqda”.
Ikkinchi shartnoma esa So‘g‘d viloyati G‘ofurov tumanidan Qozog‘iston chakana savdo tarmoqlariga meva-sabzavot yetkazib berish bo‘yicha 500 ming dollarga teng.
Avvalroq Farg‘onadan Janubiy Koreyaga bir kunda 46 tonna gilos eksport qilingani to‘g‘risida xabar berilgandi.
Izoh (0)