Бухорода 2021 йилнинг 25—27 июнь кунлари «Янги Ўзбекистон ёшлари, бирлашайлик!» шиори остида ёшлар фестивали бўлиб ўтди. Фестиваль 22 та лойиҳани ўз ичига қамраб олди. Мазкур фестивалда иштирок этган «Дарё» мухбири тадбирнинг эътиборга молик лаҳзаларини суратга олди.
Ёшлар ишлари агентлигининг вилоят бошқармаси ахборот хизмати раҳбари Зарнигор Шукуровага кўра, уч кун давом этган фестивалда 400 мингдан ортиқ йигит-қиз қатнашган.
Фестивальнинг «Спортни сев — спорт билан яша!» деб номланган илк лойиҳаси вилоятнинг барча туман ва шаҳарларида амалга оширилиб, мутасадди раҳбарлар ҳамда ёшлар жалб этилди.
«Карвон юриши» лойиҳасида эса давлат байроғи Бухоро шаҳрининг марказий кўчалари бўйлаб айлантирилди. «Ўзбекистон ёшлари 30 йил» ёзуви шакллантирилди.
Фестивальнинг очилишида бўлиб ўтган «Арк» қўрғонидаги гала-концертда 30 мингдан ортиқ ёшлар қатнашди.
Лаби Ҳовуз мажмуасидаги «Раҳбар ва ёшлар» учрашувида ёш журналист ҳамда блогерлар, шунингдек, фаол лойиҳа иштирокчилари ҳамда инновацион лойиҳалар ғолиблари пул мукофотлари ҳамда қимматбаҳо совринлар билан тақдирланди.
«Ҳеч ким меҳр ва эътибордан четда қолмас» лойиҳасида Самандар Ҳамроқулов куйлаб, ўксик қалбли болажонларни хурсанд қилди.
Қоракўлда ўтказилган «Раҳбар ва ёшлар учрашуви»да эса туман ҳокими Шерали Саломов қоракўллик 79 нафар битирувчини олтин медал билан тақдирлади.
Ёшлар фестивалининг Бухорода бўлиб ўтиши режалаштирилган якуний маросимидаги гала-концерт пандемия кучайтирилгани боис қолдирилди.
Изоҳ (0)