Ўзбекистон ва Туркия икки мамлакат ўртасидаги ўзаро товар айланмасини йилига 10 миллиард долларга етказишни режалаштирмоқда. Бу ҳақда Туркия вице-президенти Фуат Октай 28 июнь куни Тошкентда бўлиб ўтган Туркия—Ўзбекистон иқтисодий ҳамкорлик бўйича ҳукуматлараро комиссияси йиғилишида маълум қилди, деб хабар беради Anadolu агентлиги.
«2021 йилнинг охирига бориб ўзаро товар айланмаси 4 миллиард долларга, 2023 йилга бориб 5 миллиард долларга етади», — дейди Октай.
Унинг сўзларига кўра, Тошкентга ташрифи якунлари бўйича икки туркийзабон давлатлар ўртасидаги ҳамкорликни янада чуқурлаштиришга қаратилган 58 банддан иборат ҳаракат режаси келишиб олинган.
«Мулоқотнинг муҳим жиҳатларидан бири, шунингдек, Туркия ва Ўзбекистон ўртасида имтиёзли савдо тўғрисида шартномани имзолашдир. Анқара Тошкентни ҳар томонлама қўллаб-қувватлашга тайёр. Ҳамкорлигимиз ўзаро ҳурмат ва манфаатли принципларга асосланган. Ишончим комилки, 2021 йил ўзбек-турк алоқаларининг ривожланиш йили бўлади», — дейди Туркия вице-президенти.
Фуат Октайнинг маълум қилишича, 2021 йил охирига қадар Туркия президенти Ражаб Тоййиб Эрдўғоннинг Тошкентга ташриф буюриши режалаштирилган. 28 июнь куни Тошкентда ўтказилган йиғилишда ушбу масала ҳам муҳокама қилинган.
Эслатиб ўтамиз, 2020 йилнинг февралида Ўзбекистон Президенти Шавкат Мирзиёев Ражаб Тоййиб Эрдўғоннинг таклифига биноан 19 февраль куни расмий ташриф билан Туркияга борганди. Туркия президенти эса 2018 йил 29 апрель куни давлат ташрифи билан Ўзбекистонга келган эди.
Изоҳ (0)