Toshkentda 27-iyun — Matbuot va ommaviy axborot vositalari kuni munosabati bilan “Yilning eng faol jurnalisti” tanlovi g‘olib va sovrindorlarini taqdirlash marosimi bo‘lib o‘tdi.
Ushbu tanlov O‘zbekiston jurnalistlari ijodiy uyushmasi tomonidan har yili an’anaviy tarzda o‘tkazib kelinadi. 2021-yilgi tanlovda 180 nafarga yaqin jurnalist 2000 dan ziyod ijodiy ishlari bilan ishtirok etdi. Ular orasidan 30 nafar g‘olib va sovrindor aniqlandi.
“Yilning eng faol jurnalisti” sifatida e’tirof etilganlar safida “Daryo” muxbiri Xonzodabegim A’zamova ham bor.
Uning dolzarb turli mavzudagi reportajlari, tahliliy materiallari, mehnat muhojirlari va turli kasb egalari bilan qilgan suhbatlari, tanlov hay’ati tomonidan munosib baholandi.
Xonzodabegim A’zamova 1995-yil Farg‘ona viloyati Oltiariq tumanida tug‘ilgan. Mehnat faoliyatini 2015-yilda Farg‘ona teleradiokompaniya muxbiri sifatida boshlagan.
2019-yilning iyun oyidan buyon “Daryo” internet nashrida o‘z faoliyatini davom ettirmoqda.
Eslatib o‘tamiz, 2019-yilda “Daryo” muxbiri Azizbek Abduvaliyev yilning eng faol jurnalistlaridan biri sifatida e’tirof etilgandi.
Avvalroq Prezident Shavkat Mirziyoyevning 25-iyundagi “Matbuot va ommaviy axborot vositalari xodimlari kuni munosabati bilan soha xodimlaridan bir guruhini mukofotlash to‘g‘risida”gi farmoni bilan “Daryo” internet nashri muxbiri Mirolim Isajonov “Kelajak bunyodkori” medali bilan mukofotlangan edi.
Xonzodabegim A’zamova qalamiga mansub maqolalar:
- “Ular bir marta o‘lsa, biz 10 marta o‘ldik”. Zangiotada koronavirusga qarshi kurashayotgan shifokorlarning yo‘qotgan bemorlari, qiyinchiliklari va kechinmalari haqida
- Kelajak haqida tasavvuri yo‘q, ta’limga e’tibor berilishini va xorijiy universitetlardan kvota ajratilishini xohlagan o‘quvchilar. Nogironligi bo‘lgan bitiruvchilar bilan suhbat
- “Yelkamdagi mas’uliyat og‘irligidan hatto tushimda ham O‘zbekistonda bo‘lib qolish men uchun qo‘rqinchli”. Moskvada ishlayotgan surxondaryolik yigit hikoyasi
- Mo‘jiza kutmang. Ozdiruvchi dorilar haqida semizgina maqola
Izoh (0)