Oliy Majlisi Senatining 25-iyun kuni o‘tkazilgan 16-yalpi majlisida Toshkent viloyatining qator tuman va shaharlar chegarasini o‘zgartirish masalasi ko‘rib chiqildi va ma’qullandi.
Senatorlar Toshkent viloyatining Oqqo‘rg‘on, Ohangaron, Bekobod, Bo‘stonliq, Bo‘ka, Zangiota, Yuqori Chirchiq, Qibray, Parkent, Piskent, O‘rta Chirchiq, Yangiyo‘l tumanlari va Olmaliq, Chirchiq, Angren, Yangiyo‘l, Bekobod shaharlari chegaralarini o‘zgartirish to‘g‘risidagi masalani muhokama qilgan.
Qayd etilishicha, bugungi kunda Toshkent viloyatining bir qancha tuman va shaharlari, jumladan, viloyatning Angren va Bekobod shaharlari hamda Qibray va Piskent tumanlari boshqa tuman va shaharlarda joylashgan anklav hududlarga ega. Bu holatlar jinoyatchilik va huquqbuzarliklarga qarshi kurashning samarali tashkil etilishi, aholining ijtimoiy ta’minoti va davlat organlari bilan o‘zaro munosabatlarini amalga oshirishi, voyaga yetmaganlarning ta’lim jarayonini nazorat qilish hamda ularni tuman (shahar) darajasidagi ommaviy tadbirlarga jalb qilish va boshqa jarayonlarda muammolarning yuzaga kelishiga sabab bo‘lmoqda.
Shu sababli, Konstitutsiya hamda “O‘zbekiston Respublikasining ma’muriy-hududiy tuzilishi to‘g‘risida”gi qonunga asosan Toshkent viloyatining yuqorida qayd etilgan tuman va shaharlari chegaralarini o‘zgartirish taklif qilinmoqda. Jami o‘zgartirilayotgan tuman va shaharlar chegaralarining yer maydoni 17 359,1 gektar bo‘lib, shundan 10 084,8 gektari qishloq xo‘jaligi yerlaridir.
“Toshkent viloyati ma’muriy-hududiy birliklar chegaralarini tartibga solish anklav hududlarni tugatish hamda mahalliy davlat hokimliklari organlari tomonidan hudud boshqaruvini yanada soddalashtirishga, qolaversa, ma’muriy-hududiy birliklarining ijtimoiy-iqtisodiy rivojlantirilishiga olib keladi.
Shuningdek, Toshkent viloyati shaharlarini 2021—2030-yillarda rivojlantirish uchun zarur bo‘lgan hududlarni belgilash, ushbu davrda investitsiya loyihalarini amalga oshirish, yangi turar joy massivlarini barpo etish orqali shaharlarning o‘sib borayotgan aholisi ehtiyojlarini qanoatlantirishga xizmat qiladi”, — deyiladi Senat xabarida.
Mazkur masala yuzasidan Oliy Majlis Senatining tegishli qarori qabul qilindi.
Eslatib o‘tamiz, 2020-yilning 5-avgustida Shavkat Mirziyoyev Toshkent shahri va Toshkent viloyatining o‘zaro chegaradosh bo‘lgan tumanlari hududlarini o‘zgartirish bo‘yicha tayyorlangan loyihalar taqdimoti bilan tanishgandi. O‘shanda aholiga qulaylik yaratish maqsadida shahardan Toshkent viloyatiga 1010 gektar, viloyatdan poytaxtga 10 196 gektar yer maydoni o‘tkazilishi rejalashtirilgandi.
Prezident raisligida 19-mart kuni o‘tkazilgan Xalq deputatlari Toshkent viloyati kengashining navbatdan tashqari 28-sessiyasida davlat rahbari Toshkent viloyati ikkiga bo‘linishi mumkinligini ham aytgandi.
15-iyun kuni Toshkent viloyatidagi tuman va shaharlar chegarasini o‘zgartirishga oid masala Oliy Majlis Qonunchilik palatasi tomonidan ko‘rib chiqildi.
Izoh (0)