Oliy Majlis Senatida yangi qo‘mita tashkil etildi

25-iyun kuni Oliy Majlis Senatining o‘n oltinchi yalpi majlisi o‘z ishini boshladi. Majlisda Senatning Axborot siyosati va davlat organlarida ochiqlikni ta’minlash masalalari qo‘mitasini tashkil etish to‘g‘risidagi masala ko‘rib chiqildi.

Muhokamalardan so‘ng senatorlar yangi qo‘mita tuzilishini ma’qulladi. Senator Farhod Boqiyev ushbu qo‘mita raisining o‘rinbosari etib saylandi.

Qo‘mita davlat organlari va tashkilotlari faoliyatining ochiqligini ta’minlash sohasini muvofiqlashtirib boradi va bu borada doimiy nazoratni amalga oshiradi.

Farhod Boqiyev — Axborot va ommaviy kommunikatsiyalar agentligi Sirdaryo viloyati boshqarmasi boshlig‘i sifatida faoliyat yuritgan, 2020-yilning 17-yanvarida Senat a’zoligiga saylangan.

Endilikda Senat tarkibidagi qo‘mitalar soni 10 taga yetdi, bunga qadar 9 ta qo‘mita mavjud edi:

• Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi;
• Budjet va iqtisodiy islohotlar masalalari qo‘mitasi;
• Sud-huquq masalalari va korrupsiyaga qarshi kurashish qo‘mitasi;
• Mudofaa va xavfsizlik masalalari qo‘mitasi;
• Fan, ta’lim va sog‘liqni saqlash masalalari qo‘mitasi;
• Xotin-qizlar va gender tenglik masalalari qo‘mitasi;
• Yoshlar, madaniyat va sport masalalari qo‘mitasi;
• Agrar, suv xo‘jaligi masalalari va ekologiya qo‘mitasi;
• Orolbo‘yi mintaqasini rivojlantirish masalalari qo‘mitasi.

Eslatib o‘tamiz, Oliy Majlis Senatining 16-yalpi majlisida Toshkent viloyati chegaralarini o‘zgartirish va oqava suv muammosi kabi masalalar ko‘rib chiqiladi. Bundan tashqari, “Rasmiy statistika to‘g‘risida”gi, “Vijdon erkinligi va diniy tashkilotlar to‘g‘risida”gi, “Sudlar to‘g‘risida”gi, “‘O‘zbekiston Respublikasining davlat tili to‘g‘risida’gi O‘zbekiston Respublikasi qonuniga o‘zgartirish va qo‘shimchalar kiritish haqida”gi, “‘2021-yil uchun O‘zbekiston Respublikasining Davlat budjeti to‘g‘risida’gi O‘zbekiston Respublikasi qonuniga o‘zgartishlar kiritish haqida”gi, “Jinoiy faoliyatdan olingan daromadlarni legallashtirishga qarshi kurashish tartibi yanada takomillashtirilishi munosabati bilan O‘zbekistonning ayrim qonun hujjatlariga o‘zgartish va qo‘shimchalar kiritish to‘g‘risida”gi qonunlar muhokama qilinishi nazarda tutilgan.