Hindistonda tarqala boshlagan, O‘zbekistonga ham kirib kelgan koronavirusning delta-plyus nomli yangi turi o‘ta yuqumli bo‘lib, hatto uning tashuvchisi yonidan niqobsiz o‘tib ketish ham xavfli. Bu haqda Hindiston tibbiyot fanlari instituti rahbari Randip Guleriyaga tayanib, India Today xabar berdi.
Olimning so‘zlariga ko‘ra, Hindiston hukumati virusning monoklonal antitanalarga chidamliligi va immunitetni “chetlab o‘tish” qobiliyatidan xavotirda. Shu bilan birga ular odatdagi COVID-19 xavfidan himoya qilish uchun ko‘rilgan umumiy choralar ushbu turga qarshi ham samarali bo‘lishini ta’kidlamoqda.
Guleriyning ta’kidlashicha, hozir laboratoriyalarda koronavirusga qarshi vaksinalarning delta-plyus shtammiga nisbatan samaradorligi o‘rganilmoqda.
Mamlakatning Sog‘liqni saqlash vazirligi, Biotexnologiya departamenti, Tibbiy tadqiqotlar bo‘yicha Hindiston kengashi hamda Ilmiy va sanoat tadqiqotlari kengashining 28 ta laboratoriyasini birlashtirgan INSACOG laboratoriya tarmog‘i ushbu yangi shtamm genomini sekvenlash ustida ishlamoqda.
Laboratoriya tarmog‘ining xulosasiga ko‘ra, yangi delta shtammi yanada yuqumliroq bo‘lib, o‘pka hujayralariga ko‘proq ta’sir qiladi va uni monoklonal antitana texnologiyalari bilan davolashning samarasi kamroq bo‘lishi mumkin. Hindiston davlat organlariga koronavirusga qarshi choralarni kuchaytirish, testlarni va vaksinatsiya sur’atini oshirish tavsiya qilindi.
Eslatib o‘tamiz, koronavirusning “hindcha” (delta) shtammi mutatsiyasi bo‘lgan delta-plyus birinchi bo‘lib Hindistonning Maxarashtra shtatida aniqlangan edi. Hindiston Sog‘liqni saqlash vazirligi aholi zich joylashgan Maxarashtra, Kerala va Madxya-Pradesh shtatlari hokimiyatlarini delta-plyus xavfidan ogohlantirdi.
Izoh (0)