Россия Мудофаа вазирлиги Британиянинг Defender эсминеци (ҳарбий кемаси) Қора денгизда Россия чегарасини бузиб кирганини маълум қилди, деб ёзади Meduza.
Ҳодиса 23 июнь куни Қримдаги Фиолент бурни яқинида юз берган. Вазирлик талқинига кўра, кема Россия қирғоқ бўйи сувларига 11:52 да кирган. У чегараларни бузган тақдирда, қурол қўлланилиши ҳақида огоҳлантирилган, аммо унга жавоб қилмаган. Шундан кейин чегара соқчи кемаси огоҳлантирувчи ўт очган, 12:19 да эса Су-24М самолёти эсминец томонга қарата «огоҳлантирувчи бомба ташлаш»ни амалга оширган. Яна тўрт дақиқадан кейин «Defender» Россия ҳудудий сувларини тарк этган.
Россия Мудофаа вазирлиги эсминецнинг хатти-ҳаракатларини БМТнинг денгиз ҳуқуқи бўйича Конвенциясининг бузилиши деб баҳолади; Россия Ташқи ишлар вазирлиги эса ҳодисани «қўпол провокация» деб атаб, идора Буюк Британиянинг Москвадаги элчисини чақиришини маълум қилди.
«РИА Новости» бомба ташланишидан аввал Су-24М бортидан олинган кадрларни эълон қилди. Бомба ташланиши ҳолатининг ўзи эса унда кўринмайди.
Буюк Британия ҳукумати эсминец томонга қарата бомбалар ташланганини рад этмоқда. Россиянинг Қрим устидан суверенитетини тан олмаётган Буюк Британия талқини бўйича эсминец «халқаро ҳуқуққа мувофиқ Украина ҳудудий сувлари орқали ҳеч нимани бузмасдан ўтиш»ни амалга оширган. Мамлакат Мудофаа вазирлиги маълум қилишича, эсминецга Россия кемалари ҳамроҳлик қилган ва таъкидланишича, бу стандарт амалиётдир. Шу билан бирга, дея қайд этади идора, Қора денгизнинг ушбу туманида россияликлар отишма машқларини ўтказаётган эди, бу ҳақда олдиндан эсминец экипажига хабар берилган.
Бортда бўлган BBC журналисти эсминец ўз йўналишини ўзгартирмаганини айтди. Мухбир Жонатан Билнинг сўзларига кўра, кеманинг йўналиши ҳақиқатан ҳам Қрим қирғоқларидан 12 денгиз милидан камроқ масофада, яъни Россия томонидан назорат қилинадиган ҳудудий сувларда жойлашган ҳудуддан ўтган ва бу «онгли қадам» бўлган. «У ердан ўтиш чоғида Defender экипажи юқори шайлик ҳолатида бўлиб турди, ҳамма постда… аммо улар ҳақиқатан отишма бўлади деб ўйламаганди ва шундай бўлди ҳам», — деди журналист. Унинг сўзларига кўра, эсминецга 20 дан ортиқ самолёт ҳамроҳлик қилган, қирғоқ соқчилиги кемалари эса Defender’ни ўз йўналишини ўзгартиришга мажбурлашга уриниб, манёврларни амалга оширди, аммо у бундай қилмади. Шу билан бирга, Билнинг таъкидлашича, кемага бевосита яқин ҳудудда отишма бўлмаган.
Defender эсминеци 14 июндан буён Қора денгизда турибди. Шу куни акваторияга Нидерландиянинг Evertsen фрегати (соқчи ҳарбий кема) кирди. Россия Мудофаа вазирлиги Ҳарбий-денгиз флоти кемаларни кузатиб бораётганини маълум қилди. 18 июндан буён улар Одесса портида турган эди. Айни пайтда Қора денгизда Американинг Labun эсминеци ҳам бор, у акваторияга 11 июнда кирган. Монтрё конвенциясига мувофиқ, Қора денгиз мамлакатлари бўлмаган давлатларнинг кемалари Қора денгизда бўлиш вақти 21 кеча-кундуз билан чекланган.
Изоҳ (0)