O‘zbekistonda 2017-yildan to hozirgi kungacha 83 milliard dollarlik investitsiyalar o‘zlashtirilgan. Bu haqda Prezident Shavkat Mirziyoyev investitsiya va eksport sohalarida olib borilayotgan va amalga oshirilishi lozim bo‘lgan ishlar bo‘yicha videoselektorda ma’lum qildi.
Qayd etilishicha, bu oldingi davrga nisbatan deyarli 2 baravar ko‘proq ko‘rsatkich.
Davlat rahbarining ta’kidlashicha, o‘zlashtirilgan mablag‘lardan 26,8 milliard dollarini xorijdan jalb qilingan mablag‘lar tashkil etadi.
Bunda to‘g‘ridan to‘g‘ri investitsiyalar — 10,6 milliard dollar, davlat kafolati ostidagi loyihalar uchun — 8,4 milliard dollar, kafolatsiz kreditlar — 6,6 milliard dollar, bank va korxonalarning xalqaro obligatsiyalari — 1,2 milliard dollarlik mablag‘ jalb qilingan.
O‘zlashtirilgan investitsiyalarning qariyb 65 foizi sanoat va infratuzilma loyihalariga to‘g‘ri keladi.
“Har bir dollar davlatimizga foyda keltirishi kerak. Investitsiya investitsiya uchun emas, ish o‘rni yaratilishi, raqobatbardosh mahsulot ishlab chiqarish uchun o‘zlashtirilishi kerak. Loyihalarning samarali ishlashi uchun esa korxonaning aylanma mablag‘i, gazi, elektr energiyasi, eksporti nima bo‘lyapti, bular bilan doim shug‘ullanish lozim”, – dedi Prezident.
Ayni paytda respublika bo‘yicha 19 mingta bo‘sh turgan va past quvvatlarda ishlayotgan obyektlar mavjud.
Shavkat Mirziyoyev bir oy muddatda bo‘sh turgan va past samarali obyektlarni to‘liq xatlovdan o‘tkazib, elektron platformasini yaratish bo‘yicha rahbarlar va hokimlarga topshiriq berdi.
Davlat rahbarining ko‘rsatmasiga ko‘ra, viloyat, tuman va shahar hokimlarining investitsiyalar bo‘yicha o‘rinbosarlariga har bir ishlamayotgan bunday obyektlar nomma-nom biriktiriladi va yil yakuniga qadar kamida 150 ming yangi ish o‘rni yaratishga mas’ul va javobgar bo‘ladi.
Izoh (0)