Shavkat Mirziyoyev raisligida 24-iyun kuni investitsiya va eksport sohalaridagi ustuvor vazifalarga bag‘ishlab o‘tkazilayotgan videoselektor yig‘ilishida “Charmsanoat” uyushmasiga 2021-yilda 221 million dollarlik 248 ta loyihani yakuniga yetkazish bo‘yicha topshiriq berildi.
Tarmoqdagi mavjud quvvatlar ayollar poyabzaliga talabni – 36 foiz, bolalar poyabzaliga – 70 foiz, sun’iy charmga – 13 foiz, charm-attorlik mahsulotlariga – 75 foizga ta’minlaydi, xolos.
Prezident mutasaddilarga bir oyda Andijon, Shahrixon, Jizzax, Namangan, Marg‘ilon, Qo‘qon, Nurafshon va Ohangaron shaharlari, Urgut va Samarqand tumanlarida charm mahsulotlari ishlab chiqarish bo‘yicha kichik sanoat zonalarini tashkil qilish yuzasidan topshiriq berdi.
Ushbu hududlarda loyihalarni amalga oshirish uchun qo‘shimcha 50 million dollar kredit liniyasi ajratiladi.
Xuddi shu kabi yil yakuniga qadar elektrotexnika ishlab chiqarish hajmini 15 trillion so‘mga yetkazish, buning uchun umumiy qiymati 140 million dollarlik 45 ta loyihani ishga tushirish bo‘yicha vazifalar qo‘yildi.
Shuningdek, Farmatsevtika agentligi viloyat hokimlari bilan birga, 2021-yilda umumiy qiymati 146 million dollarlik 36 ta loyihani ishga tushirishi shart va zarurligi ko‘rsatib o‘tildi. Jumladan, Toshkent viloyatida – 7 ta, Namanganda – 6 ta, Andijon va Samarqandda – 4 tadan, Toshkent shahri va Sirdaryoda – 3 tadan, Qoraqalpog‘iston, Xorazm va Farg‘onada – 2 tadan, Qashqadaryo, Navoiy va Surxondaryoda – 1 tadan loyiha ishga tushirilishi kerak.
Bundan avval Prezident qarori bilan xorijda charm mahsulotlarini sotish uchun Multibrand do‘konlar tashkil etilishi hamda O‘zbekistonda 2021-yildan Nike va Adidas brendi ostidagi krossovkalarni ishlab chiqarish yo‘lga qo‘yilishi haqida xabar berilgandi.
Izoh (0)