Sevimli Shurik — afsonaviy aktyor Aleksandr Demyanenko haqida ko‘pchilik bilmaydigan ma’lumotlar (foto)

Hayot bo‘lganida, 2021-yilda 84 yoshni qarshilashi mumkin bo‘lgan rus aktyori Aleksandr Demyanenko bilan bog‘liq qiziqarli ma’lumotlarni e’tiboringizga havola etamiz.

Sverdlovskda dunyoga kelgan Aleksandr Demyanenkoning otasi mahalliy opera teatri solisti bo‘lgan va konservatoriyada dars bergan. Bo‘lajak aktyorning ham ovozi chakki bo‘lmagan. Musiqiy maktabga borgan Demyanenko teatr to‘garagida chiqish qilgan. Demyanenko birinchi rafiqasi Marina Sklyarova bilan birga o‘qigan va to‘garaklarga birga qatnagan. Sklyarova aktyordan 2 yosh kichkina bo‘lgan. Maktabni tugatgan Aleksandr Moskvaga, Marina esa Leningradga o‘qigani jo‘nab ketgan. Keyinroq turmush qurgan juftlik 12 yildan ortiq birga yashagan.

Aktyor birinchi rafiqasini boshqa ayol — Lyudmila sabab kutilmagan tarzda tark etgan, Marina esa umrining oxirigacha yolg‘iz yashagan.

Demyanenko kinoda suratga tushishni erta boshlagan. Aqlli talaba, harbiy va olimlar rolini gavdalantirgan aktyor suratga tushgan Aleksandr Alovning filmi Venetsiya kinofestivalida e’tirof etilgan. Leonid Gayday bilan tanishguniga qadar 5 yil davomida esa turli lentalarda ishtirok etgan. O‘sha vaqtlar Gayday “Jiddiy bo‘lmagan” hikoyalaridagi talaba Vladik Arkov roli uchun aktyor qidirayotgan bo‘lgan. Bir qancha aktyorlar sinalganiga qaramay, Demyanenko eng mosi deb topilgan. Rejissor qahramoni malla soch bo‘lishini istagani uchun aktyorning to‘q sochlarini bo‘yoq yordamida ochartirishga qaror qilingan.

Shurik rolini gavdalantirganidan keyin rejissorlar uni faqat shunday rollarda ko‘ra boshlagan va jiddiy rollar taklif qilinmagan. Aslida, hayotda o‘ta jiddiy hamda o‘ychan bo‘lgan aktyor muxlislarining unda hamisha talaba obrazini ko‘rishi, begonalarning ko‘chalarda quchoq ochib ko‘rishishini hazm qilishga qiynalgan, shular sabab ham o‘z qahramonini yomon ko‘rgan.

“I operatsiyasi” va “Ivan Vasilyevich kasbini o‘zgartiradi” filmlarida birga suratga tushganiga qaramay, Natalya Selezneva va Demyanenko hayotda deyarli gaplashmagan. Suratga olish jarayonlaridan bir necha yillar o‘tib uchrashib qolganida aktrisa quchoqlashib ko‘rishmoqchi va gaplashmoqchi bo‘lgan. Aktyor esa shunchaki bosh silkib, salom berish bilan cheklangan, xolos. Shunga qaramay, ular gavdalantirgan qahramonlar Shurik va Lidaga qo‘yilgan haykal Krasnodar, Ryazani va Moskvadagi bog‘larni bezab turadi.

Aktyor teatrda rol ijro qilishdan tashqari, Leningrad televideniyesidagi teledasturni olib borgan hamda dublyajda ham yetakchi bo‘lgan. U Robert de Niro, Jan-Pol Belmondo, Omar Sharif va Donatas Banionislarga ovoz bergan.

Ikkinchi rafiqasi Lyudmila bilan aktyor dublyaj rejissori assistenti bo‘lib ishlayotgan vaqtda tanishgan. 12 yillik turmushdan keyin Lyudmilaga uylangan Aleksandr hayotining qolgan qismini u bilan birga kechirgan. Juftlikning farzandi bo‘lmaganiga qaramay, Lyudmilaning qizi Anjelika aktyorga o‘z farzandidek edi.

Aktyorning yuragi bilan bog‘liq jiddiy muammolari bo‘lgan. Infarktni bir marta oyoqda kechirgan Demyanenko oradan biroz vaqt o‘tib, qayta infarkt bo‘lib qolgan. Jarrohlik amaliyoti o‘tkazilishi kerak bo‘lgan, ammo aktyor ungacha yetib borolmagan. Aleksandr Demyanenko 1999-yil avgustda vafot etgan.