15-iyun kuni jinsiy zo‘ravonlikda ayblanib, 23 yilga qamalgan taniqli prodyuser Xarvi Vaynshteynga nisbatan navbatdagi mojaroli sud majlisi bo‘lib o‘tdi, deb xabar beradi “Film.ru”.
Sudya mahbusga nisbatan besh nafar ayoldan yangi ayblovlar ilgari surilgani sabab uni Los-Anjelesga ekstraditsiya qilish borasidagi talabni qanoatlantirdi. Agarda Vaynshteyn barcha holatlarda aybdor deb topilsa, uning jazo muddati maksimal darajaga oshirilib, 140 yilga ozodlikdan mahrum etilishi mumkin.
Avvalroq Vaynshteynning himoyachisi ekstraditsiyani uning sog‘lig‘idagi muammolar sabab kechiktirishga uringan edi, chunki qandli diabet sabab uning ahvoli og‘irlashgan va mahbusga tez tibbiy yordam kerak bo‘lgan. Biroq prokuratura sobiq prodyuser ekstraditsiyani amalga oshira oladi deb hisoblagan. Buning ustida Los-Anjelesda tibbiyot xizmati mamlakatda eng yaxshi hisoblanadi.
Eslatib o‘tamiz, Vaynshteynga qarshi birinchi ommaviy ayblovlar 2017-yil oktabrida The New York Times va New Yorker gazetalarida Miramax va The Weinstein Company kino kompaniyalari xodimlariga, shuningdek, u suratga olgan filmlarda rol o‘ynagan aktrisalarga nisbatan uzoq muddatli jinsiy zo‘ravonlik qilgani haqidagi maqolalar e’lon qilinganida paydo bo‘lgan.
Shundan buyon Vaynshteynni 80 dan ortiq ayol jinsiy zo‘ravonlikda ayblagan. Ular orasida Anjelina Joli, Gvinet Peltrou, Uma Turman, Salma Hayek ham bor. U ishdan olingan, kompaniyasi esa bankrot deb e’lon qilingan. Vaynshteynga qarshi rasmiy ayblov 2018-yil may oyida e’lon qilingan bo‘lib, u Nyu-York politsiyasiga taslim bo‘lgan. Nyu-Yorkda Vaynshteynga qarshi sud boshlanganidan keyin Los-Anjeles prokuraturasi ham yangi ayblovlarni ilgari surgan.
Prodyuser Nyu-York qamoqxonasida bo‘lgan vaqtida koronavirus bilan kasallangan va deyarli ko‘r bo‘lib qolgan. Vaynshteynning o‘zi hozirga qadar aybini rad etib, o‘ziga nisbatan chiqarilgan hukmga qarshi apellyatsiya berib kelmoqda.
Izoh (0)