Adliya vazirligi “Haqiqat va taraqqiyot” sotsial-demokratik partiyasini davlat ro‘yxatidan o‘tkazish rad etilganini ma’lum qildi.
Qayd etilishicha, Adliya vazirligi tomonidan ushbu partiyani davlat ro‘yxatidan o‘tkazish yuzasidan arizalar va ilova qilingan hujjatlar qonunchilikda belgilangan tartibda ikki marta o‘rganib chiqilgan. Partiyani davlat ro‘yxatidan o‘tkazish bo‘yicha hujjatlar “Siyosiy partiyalar to‘g‘risida” va “Nodavlat notijorat tashkilotlari to‘g‘risida”gi qonunlar talablariga rioya qilinmagan holda taqdim qilinganligi aniqlangan.
“Siyosiy partiyalar to‘g‘risida”gi qonunning 6-moddasiga ko‘ra, siyosiy partiyani tuzish uchun kamida 8 ta hududiy subyektda (viloyatda), shu jumladan, Qoraqalpog‘iston Respublikasi va Toshkent shahrida yashayotgan hamda partiyaga birlashish istagida bo‘lgan kamida 20 000 fuqaroning imzosi bo‘lishi talab etiladi. Biroq partiyani davlat ro‘yxatidan o‘tkazish bo‘yicha bor-yo‘g‘i 9 873 ta imzo yig‘ilgan.
7-apreldagi arizaga 7 675 ta (qo‘shimcha 944 ta) va 7 iyundagi arizaga 1 254 ta imzo qo‘ygan fuqarolarning ro‘yxatlari ilova qilingan. O‘rganish jarayonida aniqlanishicha, imzolar ro‘yxatida ko‘rsatilgan shaxslarning 42 nafari vafot etgan.
“Yuqorida ko‘rsatilgan imzolar partiya tuzish bilan bog‘liq bo‘lmagan holda turli sabablar asosida yig‘ilgani sababli imzolarni hisobga olmaslik (bekor qilish) haqida bugungi kunga qadar vazirlikka jami 2 292 ta murojaat kelib tushdi. Shunga ko‘ra, ‘Haqiqat va taraqqiyot’ sotsial-demokratik partiyasini davlat ro‘yxatidan o‘tkazish rad etildi”, — deyiladi xabarda.
Vazirlik, shuningdek, “Siyosiy partiyalar to‘g‘risida”gi qonunning 6-moddasiga asosan, tashkiliy qo‘mita tuzilgan kundan boshlab uzog‘i bilan uch oy faoliyat ko‘rsatish huquqiga egaligi va shu munosabat bilan, belgilangan muddat o‘tgandan keyin tashkiliy qo‘mita o‘z faoliyatini tugatishi, imzolar yig‘ish to‘xtatilishi haqida eslatib o‘tgan.
“Haqiqat va taraqqiyot” partiyasi haqida
“Gazeta.uz”ning qayd etishicha, “Haqiqat va taraqqiyot” partiyasini tuzish boshlangani haqida 2020-yilning iyunida ma’lum bo‘lgan. Partiya rahbari Xidirnazar Allaqulov (iqtisodiyot fanlari doktori, professor, 2002—2004-yillarda Termiz davlat universitetining sobiq rektori) BBC Uzbek e’lon qilgan “Adabiyot” gazetasining bosh muharriri Baxtiyor Karim bilan intervyuda 2021-yilgi prezident saylovida o‘z nomzodini ilgari surmoqchi ekanligini ma’lum qilgan.
Uning fikricha, O‘zbekistonda faoliyat yuritayotgan siyosiy partiyalar “amaldagi hukumat tomonidan boshqarilishi va moliyalanishi” tufayli mavjud vaziyatni xalq manfaatiga mos ravishda o‘zgartirishga qodir emas.
“Bu partiyalar va ularning dasturlari yaxlit bir millatning manfaatlariga emas, ayrim olingan ijtimoiy guruhlarning manfaatlariga xizmat qilishni ustuvor deb bilishadi”, — degan Allaqulov. Shuningdek, 2016-yilning avgustida boshlangan islohotlar to‘xtab qolgani va mamlakatdagi vaziyat yana ortga qayta boshlaganini ta’kidlagan.
Eslatib o‘tamiz, O‘zbekistonda 2021-yilgi prezident sayloviga jami 300 milliard so‘m, har bir nomzodga esa 3 milliard so‘mdan ajratiladi.
Izoh (0)