Адлия вазирлиги «Ҳақиқат ва тараққиёт» социал-демократик партиясини давлат рўйхатидан ўтказиш рад этилганини маълум қилди.
Қайд этилишича, Адлия вазирлиги томонидан ушбу партияни давлат рўйхатидан ўтказиш юзасидан аризалар ва илова қилинган ҳужжатлар қонунчиликда белгиланган тартибда икки марта ўрганиб чиқилган. Партияни давлат рўйхатидан ўтказиш бўйича ҳужжатлар «Сиёсий партиялар тўғрисида» ва «Нодавлат нотижорат ташкилотлари тўғрисида»ги қонунлар талабларига риоя қилинмаган ҳолда тақдим қилинганлиги аниқланган.
«Сиёсий партиялар тўғрисида»ги қонуннинг 6-моддасига кўра, сиёсий партияни тузиш учун камида 8 та ҳудудий субъектда (вилоятда), шу жумладан, Қорақалпоғистон Республикаси ва Тошкент шаҳрида яшаётган ҳамда партияга бирлашиш истагида бўлган камида 20 000 фуқаронинг имзоси бўлиши талаб этилади. Бироқ партияни давлат рўйхатидан ўтказиш бўйича бор-йўғи 9 873 та имзо йиғилган.
7 апрелдаги аризага 7 675 та (қўшимча 944 та) ва 7 июндаги аризага 1 254 та имзо қўйган фуқароларнинг рўйхатлари илова қилинган. Ўрганиш жараёнида аниқланишича, имзолар рўйхатида кўрсатилган шахсларнинг 42 нафари вафот этган.
«Юқорида кўрсатилган имзолар партия тузиш билан боғлиқ бўлмаган ҳолда турли сабаблар асосида йиғилгани сабабли имзоларни ҳисобга олмаслик (бекор қилиш) ҳақида бугунги кунга қадар вазирликка жами 2 292 та мурожаат келиб тушди. Шунга кўра, ‘Ҳақиқат ва тараққиёт’ социал-демократик партиясини давлат рўйхатидан ўтказиш рад этилди», — дейилади хабарда.
Вазирлик, шунингдек, «Сиёсий партиялар тўғрисида»ги қонуннинг 6-моддасига асосан, ташкилий қўмита тузилган кундан бошлаб узоғи билан уч ой фаолият кўрсатиш ҳуқуқига эгалиги ва шу муносабат билан, белгиланган муддат ўтгандан кейин ташкилий қўмита ўз фаолиятини тугатиши, имзолар йиғиш тўхтатилиши ҳақида эслатиб ўтган.
«Ҳақиқат ва тараққиёт» партияси ҳақида
«Gazeta.uz»нинг қайд этишича, «Ҳақиқат ва тараққиёт» партиясини тузиш бошлангани ҳақида 2020 йилнинг июнида маълум бўлган. Партия раҳбари Хидирназар Аллақулов (иқтисодиёт фанлари доктори, профессор, 2002—2004 йилларда Термиз давлат университетининг собиқ ректори) BBC Uzbek эълон қилган «Адабиёт» газетасининг бош муҳаррири Бахтиёр Карим билан интервьюда 2021 йилги президент сайловида ўз номзодини илгари сурмоқчи эканлигини маълум қилган.
Унинг фикрича, Ўзбекистонда фаолият юритаётган сиёсий партиялар «амалдаги ҳукумат томонидан бошқарилиши ва молияланиши» туфайли мавжуд вазиятни халқ манфаатига мос равишда ўзгартиришга қодир эмас.
«Бу партиялар ва уларнинг дастурлари яхлит бир миллатнинг манфаатларига эмас, айрим олинган ижтимоий гуруҳларнинг манфаатларига хизмат қилишни устувор деб билишади», — деган Аллақулов. Шунингдек, 2016 йилнинг августида бошланган ислоҳотлар тўхтаб қолгани ва мамлакатдаги вазият яна ортга қайта бошлаганини таъкидлаган.
Эслатиб ўтамиз, Ўзбекистонда 2021 йилги президент сайловига жами 300 миллиард сўм, ҳар бир номзодга эса 3 миллиард сўмдан ажратилади.
Изоҳ (0)