Ijtimoiy tarmoqlarda evakuatorga ortilgan 710 ot kuchiga ega Ferrari F8 Tributo avtomobilining videosi tarqaldi. Ma’lum bo‘lishicha, Las-Vegasda istiqomat qiluvchi fuqarolardan biri superkarni mahalliy kompaniyadan ijaraga olgan. Oradan biroz vaqt o‘tib u firma vakillari bilan bog‘langan va toshni bosib ketishi oqibatida avtomobilni urib olganini ma’lum qilgan, deb xabar beradi Motor.
Mahalliy fuqarolardan biri 350 ming dollar turadigan yorqin qizil rangli Ferrari F8 Tributo’da Las-Vegas ko‘chalari bo‘ylab harakatlanishni istagan. Biroq barchasi haydovchi o‘ylaganidek bo‘lib chiqmagan. Mashina ijaraga olinganidan bir necha soat o‘tib, erkak kattaroq toshni bosib ketishi oqibatida sportkarga biroz shikast yetgan.
Voqea joyiga yetib kelgan firma vakillari haydovchining versiyasini shubha ostiga olgan. Mutaxassislar old splitterga yetgan zararga, ishga tushgan xavfsizlik yostiqchasi, shuningdek, singan g‘ildirak diskalari va qanot qismining bir bo‘lagi uzilib tushganiga e’tibor qaratgan. Bundan tashqari, ekspertlar yo‘lda kuzovning asfalt bo‘ylab sirpanish izlarini ko‘rgan, bu esa tormoz yo‘lining uzunligidan dalolat beradi.
Ferrari F8 Tributo kompaniyaga qaytarilishi bilan muhandislardan biri superkarni ko‘zdan kechirishga kirishgan. Ekspert mashinaning ost qismidagi tirnalishlar va g‘ildirak arkalarining ichiga jiddiy shikast yetganini ta’kidlagan. Biroq sanab o‘tilgan nuqsonlarning birortasi qoq ikkiga bo‘lingan avtomobil “podveska”si bilan tenglasha olmaydi. Texnik mutaxassisning ma’lum qilishicha, bu kabi shikast faqatgina kuchli zarba oqibatida yuzaga kelishi mumkin. Ijaraga olingan avtomobil sug‘urta qilinganiga qaramay, firma mijozini sug‘urta kompaniyasi bilan jiddiy suhbat kutmoqda.
Avvalroq AQShda salondan minib chiqilgan yangi Toyota Supra daraxtga urilgani, shuningdek, yangi Chevrolet Corvette xarid qilinganidan bir kun o‘tib YTHga uchragani to‘g‘risida xabar berilgandi.
Izoh (0)