Metro Plaza компанияси Тошкентдаги газета мажмуасини («Газета корпуси» номи билан машҳур) сотиб олиш бўйича тендерда ғолиб бўлди. Бу ҳақда Давлат активларини бошқариш агентлиги матбуот хизмати хабар берди.
Бино пойтахтнинг Миробод туманидаги Бухоро ва Нуронийлар кўчалари кесишмасида жойлашган. Умумий ер майдони 1,2 гектарни, бино ва иншоотларнинг майдони 19 152 квадрат метрни ташкил этади, шундан қурилиш учун 17 863 квадрат метр ажратилган.
Давлат активларини бошқариш агентлиги маълумотларига кўра, Metro Plaza бинони 78 миллиард сўмга хусусийлаштиради.
Metro Plaza компанияси ҳақида
«Gazeta.uz»нинг Корхона ва ташкилотларнинг ягона давлат регистрига таяниб ёзишича, Metro Plaza МЧЖ 2021 йил 21 апрелда 20 миллиард сўмлик устав капитали билан рўйхатдан ўтган. Асосий фаолияти — бизнес ва менежмент масалалари бўйича консалтинг. Компания асосчилари Миродил Фозилов (50 фоиз), Ҳасан Мамасаидов (25 фоиз) ва Ҳусан Мамасаидов (25 фоиз), раҳбари Оятулло Асқаров.
Ака-ука Мамасаидовлар Office Маrket (полиграфия), Dekos (реклама маҳсулотлари ва бизнес совғаларини етказиб бериш ва ишлаб чиқаришга ихтисослашган) компанияларига ҳамда MFaktor лойиҳаси (бизнес ва тадбиркорлик ҳақидаги YouTube лойиҳаси)га асос солган таниқли тадбиркорлар ҳисобланади.
Миродил Фозилов ҳам турар жой бинолари қурилишига ихтисослашган Oazis Lux Investments (50 фоиз, Oazis меҳмонхонаси) ва Royal Central Development (100 фоиз) компанияларининг улушига эгалик қилади.
Аввалроқ Тошкентда ДХХнинг собиқ биносини 210 миллиард сўмга ТИВ раҳбари ўғлига тегишли компания сотиб олгани тўғрисида хабар берилганди.
Эслатиб ўтамиз, «Газета корпуси» номи билан таниқли бино 2018 йилда 18,2 миллиард сўмлик бошланғич нарх билан кимошди савдосига қўйилган эди. Ўша йилнинг апрель ойи охирида Тошкент шаҳар ҳокими вазифасини бажарувчи этиб тайинланган Жаҳонгир Ортиқхўжаев шаҳар марказидаги етти қаватли маъмурий бино иштирокидаги кимошди савдосини тўхтатганди.
Изоҳ (0)