Qirg‘iziston poytaxti Bishkekda koronavirus bilan kasallanish holati ortgani sababli shahar hokimligi ko‘ngilochar muassasalar faoliyatiga cheklovlar kiritmoqda. Bu haqda Kloop xabar berdi.
Xabarga ko‘ra, ko‘ngilochar muassasalar (tungi klublar, restoranlar, umumiy ovqatlanish shoxobchalari, kafelar, karaoke va barlar) faoliyatiga soat 23:00 dan 07:00 gacha taqiq qo‘yildi. Cheklovlar 17-iyundan kuchga kiradi.
Ushbu qaror 16-iyun kuni shahar hokimligi vakillari, shahar sog‘liqni saqlash boshqarmasi va sanitariya-epidemiologiya nazorati xodimlari ishtirokidagi yig‘ilishda qabul qilindi. Hokimlikning izoh berishicha, mazkur cheklovlarga epidemiologik vaziyatning yomonlashuvi sabab bo‘lgan.
“Tumanlar rahbarlari, Davlat sanitariya-epidemiologiya nazorati markazi va shahar transport departamenti tomonidan muntazam ravishda qo‘shma reydlar o‘tkazilib, tadbirkorlik subyektlarining vaqtinchalik sanitariya-epidemiologiya qoidalariga rioya etishi ta’minlanadi”, — deyiladi shahar hokimligi xabarida.
Avvalroq sog‘liqni saqlash vaziri Alimqodir Beyshenaliyev epidemiologik vaziyat yomonlashgani sababli shahar hokimligiga poytaxtda ba’zi cheklovlarni kiritishni taklif qilganini aytgandi. Uning so‘zlariga ko‘ra, mamlakatda koronavirus bilan kasallanish keskin o‘sa boshlagan va buni uchinchi to‘lqin deb atash mumkin.
“Aloqalarni davom ettirish bilan yoshlar virus tashuvchisiga aylanmoqda. Shuningdek, jamoat transportida majburiy niqob rejimiga rioya qilish va ovqatlanish shoxobchalarida ijtimoiy masofa bo‘yicha tavsiyalar mavjud. O‘rinbosarlarim reydlar natijalariga asoslanib, ma’lum qilishicha, sanitariya qoidalariga hech qayerda rioya qilinmayapti” — dedi Beyshenaliyev.
15-iyun kuni bo‘lib o‘tgan brifingda sog‘liqni saqlash vaziri o‘rinbosari Jalolidin Rahmatullayev COVID-19’ning uchinchi to‘lqini boshlanganini e’lon qildi. Uning so‘zlariga ko‘ra, shu sababli rasmiylar kasalxonalarga 3 mingdan ziyod koykalar joylashtirgan va yana 1,5 mingtasini zaxiraga qoldirgan.
Shuningdek, uning ta’kidlashicha, hozirgi kunda mamlakatda koronavirusning to‘rt xil shtammi kezib yuribdi, xususan, ularning 44 foizini “britancha” shtamm, 39 foizini Rossiyadan kirib kelgan shtamm tashkil qilmoqda.
16-iyun holatiga ko‘ra, Qirg‘izistonda jami 111 990 kishida koronavirus qayd etilgan. Ulardan 1912 nafari kasallikdan vafot etgan.
Mavzuga doir:
Izoh (0)