Jinoyat ishlari bo‘yicha Jalaquduq tuman sudi to‘rt oylik o‘g‘il farzandini 5200 dollarga sotayotgan vaqtida qo‘lga olingan ayolga hukm o‘qidi, deya xabar berdi “Daryo” muxbiri Umidjon Mamarasulov.
Ma’lum qilinishicha, 20 yoshli fuqaro Dilnavoz Kozimova (barcha ism-familiyalar o‘zgartirilgan) 2020-yil 12-dekabr kuni, taxminan, soat 16:30 da Jalaquduq tumanining “Bozorboshi” mahallasida joylashgan “Gap” nomli oshxonada o‘zining 2020-yil 15-avgust kuni tug‘ilgan farzandi Mavlonbek Xursandbekovni xolis xaridor Muqaddas Fayzullayevaga 5200 dollarga sotayotganda qo‘lga olingan.Sud majlisida sudlanuvchi Dilnavoz Komilova 2018-yilning dekabr oyida Bekmurod ismli fuqaro bilan turmush qurgani, biroq oilaviy kelishmovchiliklar sabab 2019-yilning sentabr oyida ajrashgani, shundan so‘ng hech qancha vaqt o‘tmasdan uch nafar farzandi bor Nosir ismli erkak bilan tanishib qolib, ishqiy munosabatda bo‘lgani ma’lum bo‘ldi.
Qayd etilishicha, 2020-yil fevral oyi oxirlarida Nosir ismli tanishidan homilador bo‘lib qolgan ayol bu haqda Nosirga aytganida u tug‘ilajak farzandini birga tarbiyalashini bildirgan. Homilasi sezilib qolganidan so‘ng Dilnavoz tumanning “G‘arbiy” dahasidan ijaraga uy topib, o‘sha yerda Nosir bilan birga yashay boshlagan. 2020-yil 15-avgust sanasida o‘g‘il farzandli bo‘lgach, ijarada turgan uyning sharoitlari yaxshi emasligini aytib, ota-onasining uyiga qaytgan. Nosir esa qonuniy turmushidan farzandlari borligini, undan orttirgan bolasi kerakmasligini aytib, xabar olmay qo‘ygan.
“Shundan so‘ng tushkunlikka tushib qoldim. Bundan tashqari farzandim kasallik bilan tug‘ilgani uchun uni davolatishim kerak edi. Noyabr oyi o‘rtalarida uyimizga Muqaddasxon ismli ayol kelib, boqib olish uchun bola kerakligini aytib, iloji bo‘lsa, o‘g‘limni unga berishimni so‘radi. U ayol bolamni vasiylik-homiylik organi orqali qonuniy qaramog‘imga olaman deb va’da bergandi. Biroq men o‘g‘limni hech kimga bermasligimni, o‘zim tarbiyalab katta qilishimni aytdim. Shunday bo‘lsa-da, Muqaddas opa tinmay qo‘ng‘iroq qilib, evaziga uy yoki pul berishini aytib turib oldi. Unga hech narsa kerakmasligini, faqat bolaning boshini operatsiya qilib, davolatish zarurligini aytdim. Lekin bermadim. U yana bezovta qila boshladi. O‘sha paytlarda pulga qiynalib qolganim uchun bolamni 4500 dollarga sotishga rozi ekanligimni bildirdim. 2020-yil 12-dekabr kuni Muqaddas opa bilan telefon orqali bog‘lanib, aytilgan vaqtda aytilgan joyga borib undan pulni olib, tilxat yozib berayotganimda ushlandim. Bu ishni o‘zim xohlab qilganim yo‘q, u ayol hadeb pul taklif qilavergani va o‘zi o‘sha paytda tushkun holatdaligim, otasi ham undan yuz o‘girgani uchun majbur bo‘ldim. Buning uchun barchadan kechirim so‘rayman”, — deya afsusdaligini bildirgan sudlanuvchi ayol.
Sud mazkur jinoyat ishini ko‘rib chiqib, Dilnavoz Kozimovani Jinoyat kodeksining 135-moddasi (odam savdosi) bilan aybli deb topib, unga Jinoyat kodeksining 57-moddasi (yengilroq jazo tayinlash)ni qo‘llab, 3 yil muddatga ozodlikni cheklash jazosini tayinladi.
Izoh (0)