Andijonda onasi tomonidan kaltaklanib, tilanchilik qilishga majburlab kelingani aytilgan bola voqeasi yuzasidan tegrovga qadar tekshiruv boshlangani xabar berilgandi. Bola manfaatlarini ko‘zlab, ushbu ayol onalik huquqidan mahrum qilinishi mumkin.
Bosh prokuratura matbuot xizmatining “Daryo” so‘roviga asosan ma’lum qilishicha, 14-iyun kuni voyaga yetmagan bola Q.T.ning manfaatlarini ko‘zlab, Andijon tuman xalq ta’limi bo‘limi, bolalarni ijtimoiy himoyalash vasiylik va homiylik organi tomonidan “Onalik huquqidan mahrum to‘g‘risida” FIB Andijon tumanlararo sudiga da’vo arizasi kiritildi.
Ayni paytda bola Andijon viloyati teri-tanosil kasalliklari shifoxonasida sog‘lig‘ini tiklash maqsadida davolanmoqda. Shifokorlar tomonidan uning ruhiy holatini inobatga olgan holda hozirda tushuntirish olish va tekshiruvga jalb etish tavsiya etilmagan. Ish holatlaridan kelib chiqqan holda voyaga yetmagan ushbu boladan psixolog va pedagog ishtirokida keyinchalik tushuntirish olish maqsadga muvofiq deb topilgan.
Uning badanida tan jarohatlari yoki uning izlari mavjudligiga aniqlik kiritish maqsadida sud-tibbiy ekspertizasi tayinlanib, ekspert tomonidan shifoxonada ko‘ruv o‘tkazilgan.
3-iyundagi dastlabki xulosada voyaga yetmagan T.Q.ning badanida yuz, burun-og‘iz teshigi atrofida teri kasalligi, bosh qismida ko‘plab och pushti rangli teri butunligi buzilgandan so‘ng chandiqlar hamda kindik sohasi teshigi yuzasida katta yuzali qizg‘ish rangli dog‘lar, o‘ng dumba yuzasi tashqi kvadratidagi qontalash va o‘ng tirsak bo‘g‘imi tashqi yuzasida shilinma jarohatlar mavjudligi, kasallik tarixi hujjatlarini o‘rganish yakunlari bo‘yicha ekspert xulosasi tayyorlanishi qayd etilgan.
Ekspertning 13-iyundagi xulosasida Q.T.ning badanida yuz, burun-og‘iz teshigi atrofida “teri kasalligi” hamda bosh qismida ko‘plab och pushti rangli teri butunligi buzilgandan so‘ng chandiqlar, har ikkala kaft sohasi tashqi yuzasi terisida katta yuzali qizg‘ish rangli dog‘lar, o‘ng dumba yuzasi tashqi kvadratidagi qontalash va o‘ng tirsak bo‘g‘imi tashqi yuzasida shilinma jarohatlar mavjudligi, qo‘shimcha kasallik tarixi hujjatlarini o‘rganish yakunlari bo‘yicha ekspert xulosasi tugatilishi qayd etilgan.
Bosh prokuraturaning bildirishicha, olib borilayotgan tergovga qadar tekshiruv natijasiga ko‘ra qabul qilingan qaror yuzasidan qo‘shimcha ravishda batafsil ma’lumot taqdim etilishi ta’minlanadi.
Hozirda mazkur holat yuzasidan tergovga qadar tekshiruv harakatlari shahar prokuraturasi tomonidan nazoratga olingan holda shahar IIOFMB tomonidan olib borilmoqda.
Izoh (0)