Buxoroda qo‘lbola tayyorlangan iste’molga yaroqsiz yog‘ mahsulotini sotayotgan shaxs qo‘lga olindi

Buxoro viloyati Kogon shahrida inson salomatligiga zararli bo‘lgan yog‘ sotayotgan shaxs ushlandi, deya xabar bermoqda viloyat IIB.

Qayd etilishicha, Buxoro viloyati huquqni muhofaza qiluvchi idoralar xodimlarining navbatdagi tezkor tadbiri davomida Kogon shahar “Sohibkor dehqon bozori” MChJ avtoturargohida Kogon shahar “Adolat” mahallasida yashovchi, 1968-yilda tug‘ilgan Z.H. ismli shaxs o‘zga bir shaxsga qo‘lbola usulda chigitdan olingan har bir litr yog‘ni 30 000 so‘mdan sotishga kelishib, 120 litr yog‘ni 3 550 000 so‘mga sotayotgani aniqlangan.

Z.H.dan tegishli tartibda hujjatlashtirib olingan 120 litr juvoz yog‘i Sanitariya-epidemiologik osoyishtalik va jamoat salomatligi xizmati xulosasiga ko‘ra inson hayoti hamda sog‘lig‘iga xavf soluvchi, shuningdek, iste’molga yaroqsiz ekani aniqlangan. Ushbu yog‘ mahsuloti iste’mol qilinganida oshqozon va jigar a’zolariga salbiy ta’sir etib, o‘tkir hamda surunkali zaharlanish holatlarini keltirib chiqarishi mumkinligi ko‘rsatilgan.

Mazkur holat yuzasidan Z.H.ga nisbatan Jinoyat kodeksining 186-2-moddasi 1-qismi (chigitdan olinadigan mahsulotni qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, dastlabki tergov harakatlari olib borilmoqda.

Bundan avval Qashqadaryoda qo‘lbola yog‘ ishlab chiqarayotgan fuqaro aniqlangani, Toshkentda sotilayotgan “Andijon muzqaymoqlari”da ichak kasalliklarini qo‘zg‘ovchi bakteriyalar aniqlangani hamda Qashqadaryoda 600 kg iste’molga yaroqsiz go‘sht yo‘q qilingani haqida xabar berilgandi.