Сурхондарёда қиммат нархларда Москвага олинган чипталар сохталиги, 100 дан ошиқ йўловчи аэропортда сарсон бўлаётгани рад этилди

Ижтимоий тармоқларда «Сурхондарёдан қиммат нархларда Москвага олинган чипталар сохта эканлиги, 100 дан ошиқ йўловчи аэропортда сарсон бўлаётганликлари айтилмоқда» сарлавҳали видеотасвир тарқалди. Унда бир қанча йўловчилар юклари билан аэропортда ўтиргани акс этган. Термиз халқаро аэропорти маъмурияти мазкур ҳолат батафсил ўрганиб чиқилганини маълум қилди.

Аниқланишича, видеотасвирда келтирилган ҳолат Термиз халқаро аэропорти ҳудудида ёки Uzbekistan Airports таркибидаги Ўзбекистондаги бошқа халқаро аэропортлар ҳудудида тасвирга олинмаган, балки бу каби ҳолат юз берганлиги ҳақида фуқаролардан мурожаат ҳам бўлмаган.

«Маълумот учун айтиш жоизки, Термиз халқаро аэропорти йўловчиларга юқори даражада хизмат кўрсатиш ва улар учун барча шарт-шароитларни яратиш, аэропортнинг тегишли хизматлари самарали ишлашини таъминлаш, йўловчилар, юклар, почта ва багажга хизмат кўрсатиш жараёнларини оптималлаштириш, аэропорт ҳудудида замонавий савдо, овқатланиш объектлари, йўловчиларга банк ва бошқа хизматларни кўрсатиш тармоқларини давлат-хусусий шериклик шартлари асосида фаолиятини амалга оширади», — дейилади Термиз халқаро аэропорти хабарида.

Шунингдек, қўшимча қилинишича, Термиз халқаро аэропортининг ўзига мустақил равишда авиачипталар сотиш ваколати белгилаб берилмаган ва бу корхонанинг фаолиятига тааллуқли ҳам эмас. Термиз халқаро аэропортининг қатъий тартибдаги назорат қисмларида авиачипталарни сохталаштирилиши билан боғлиқ ҳолатларга йўл қўйилмайди.

Авиавокзал биносида мунтазам равишда йўловчиларга аэропорт назоратчи ходимлари томонидан авиапарвознинг тартиб-тамойиллари бўйича тушунтириш ишлари олиб борилиши, кутиш залларида ўрнатилган мониторларда йўловчиларни огоҳликка чорловчи видеороликлар намойиш этиб келиниши билдирилган.

Аввалроқ ижтимоий тармоқларда Қарши аэропортида турган самолётда йўловчилар бир ярим соат давомида туриб қолгани, уларга ҳаво етишмай, икки нафарининг тоби қочгани айтилган видео тарқалганди. Парвоз Россиянинг Royal Flight авиакомпанияси томонидан амалга оширилгани, йўловчилар бортга чиқарилгандан сўнг ҳаво ҳароратининг 44 даражадан юқори бўлиши сабаб самолёт двигателлари ишламай қолгани маълум қилинганди. Натижада ушбу парвозни тунги вақтда амалга ошириш қарори қабул қилиниб, йўловчилар бортни тарк этган. Йўловчиларнинг соғлиғи ёмонлашгани ҳақида хабар келиб тушмаган.