Shimoliy Atlantika ittifoqi (NATO)ga a’zo davlatlar rahbarlari Amerika—Rossiya sammiti oldidan AQSh prezidenti Jo Bayden bilan maslahatlashmoqchi. Bu haqda tashkilot bosh kotibi Yens Stoltenberg ma’lum qildi, deb yozadi “RBK”.
“Ishonchim komilki, NATO rahbarlari Putin bilan uchrashuv oldidan AQSh prezidenti bilan maslahatlashish imkoniyatidan mamnun bo‘ladi”, — dedi u.
Tashkilot bosh kotibi, shuningdek, Sovuq urush davridan buyon Rossiya va NATO o‘rtasidagi munosabatlar eng quyi darajada ekanini qayd etib o‘tdi.
Uning fikricha, NATO sammitida ishtirokchi mamlakatlar rahbarlari Moskva bilan muloqot va tiyilishni ta’minlaydigan munosabatlar konsepsiyasini qo‘llab-quvvatlashini yana bir bor tasdiqlashi kerak.
Bosh kotibning so‘zlariga ko‘ra, NATO Rossiyani jilovlashga tayyor va 2014-yildan beri har yili mudofaa budjeti uchun xarajatlar miqdorini oshirib kelmoqda.
NATO sammiti 14-iyun kuni Bryusselda bo‘lib o‘tadi. Oq uy bayonotida aniqlik kiritilishicha, ittifoq Rossiyaning “agressiv siyosati”ga qarshi kurashish uchun o‘z strategik konsepsiyasini qayta ko‘rib chiqadi.
Bir kun oldin Defense News portali AQSh va Yevropadagi manbalariga asoslanib, NATOga a’zo davlatlar sammitdan so‘ng Yevropada quruqlik yadro qurollarini joylashtirishdan bosh tortishini e’lon qilishi mumkinligi haqida xabar berdi. Nashrning aniqlik kiritishicha, bu AQSh prezidenti Jo Baydenning Rossiya prezidenti Vladimir Putin bilan uchrashuvidan oldin siyosiy ziddiyatlarni yumshatish usullaridan biridir.
Jo Bayden va Vladimir Putinning yuzma-yuz uchrashuvi 16-iyun kuni Jenevadagi La Grange villasida bo‘lib o‘tadi.
Mavzuga doir:
Izoh (0)