Jons Hopkins universiteti ma’lumotlariga ko‘ra, dunyoda koronavirusga chalinganlar soni 175 966 572 kishiga yetdi, shulardan 3 804 259 kishi virus qurboniga aylandi. Kasallanganlar soni bo‘yicha AQSh (33,4 million), Hindiston (29,5 million), Braziliya (17,4 million), Fransiya (5,8 million) va Turkiya (5,3 million) eng oldinda bormoqda.
Braziliya prezidenti niqob taqmagani uchun jarimaga tortildi
Braziliya prezidenti Jair Bolsonaruga San-Paulu shtatida bo‘lib o‘tgan motopoygada niqob taqmagani uchun jarima solindi.Shtatda 2020-yil may oyidan buyon jamoat joylarida niqob taqmaganlik uchun taxminan 110 dollarga teng jarima jazosi amal qilib keladi.
Bolsonaru niqobsiz holatda dastlab o‘z tarafdorlari qurshovida mototsiklda sayr qilgan bo‘lsa, so‘ng xalq bilan muloqotda bo‘ldi.
Davlat rahbari fikricha, to‘liq emlangan odamlar niqob taqishi shart emas, chunki ular boshqalarga virus yuqtira olmaydi, buning aksini da’vo qiluvchilar esa ilm-fanga ishonmaydi.
Ayni vaqtda AQSh Kasalliklar nazorati va profilaktikasi markazi to‘liq emlangan odamlardan koronavirus yuqishi xavfini istisno qilmayapti.
Braziliya Sog‘liqni saqlash vazirligi ma’lumotlariga ko‘ra, mamlakat aholisining 12 foizigina COVID-19’ga qarshi vaksinaning ikkala dozasini ham olgan. Aksariyat ekspertlar aholining katta qismi emlanganidan keyingina niqoblardan voz kechish mumkinligini aytmoqda.
Buyuk Britaniyada lokdaunni yumshatish to‘rt haftaga kechiktirildi
Buyuk Britaniya hukumati koronavirus tarqalishi munosabati bilan kiritilgan cheklovlarni bekor qilishni to‘rt haftaga kechiktirishga qaror qildi.Bundan avval lokdaunni yumshatish 21-iyunga rejalashtirilgan edi. Bosh vazir Boris Jonson cheklovlarning amal qilish muddati uzaytirilganini tasdiqlashi kutilmoqda. Shundan keyin bu qaror Jamoatchilik palatasida ovozga qo‘yiladi.
13-iyun holatiga Britaniyada 7490 kishida koronavirus tasdiqlandi, shularning 8 nafari vafot etdi. Mamlakatda kasallanish holatlarining 91 foizini “hindcha” shtamm tashkil etadi.
Ayni vaqtda Buyuk Britaniya aholisining 41 milliondan ortig‘i bitta, 30 millionga yaqini esa ikkita dozada COVID-19’ga qarshi emlangan.
Koronavirusning “hindcha” shtammida simptomlar qanday bo‘ladi?
COVID-19’ning mutatsiyasiga qarab asosiy simptomlar ham o‘zgarishi mumkin, dedi Rossiya Iste’molchilar huquqlari himoyasi va odam farovonligi sohasidagi nazorat bo‘yicha federal xizmati Epidemiologiya markaziy ilmiy-tadqiqot instituti direktor o‘rinbosari Natalya Pshenichnaya.Uning aytishicha, “hindcha shtamm”da qorin va bo‘g‘imlarda og‘riqlar, ko‘ngil aynishi, ishtahaning va hatto eshitish qobiliyatining yo‘qolishi kuzatilishi mumkin. Olima hind shifokorlariga tayanib, ma’lum qilishicha, bemorlarda ko‘pincha oyoqlar mikrotrombozi (bu gangrena rivojlanishiga olib kelishi mumkin) va diareya uchraydi, isitma, yo‘tal va hid bilish qobiliyatining yo‘qolishi esa kamroq uchraydigan belgilar.
Pshenichnayaning so‘zlariga ko‘ra, ba’zi hollarda asosiy simptomlarning o‘zgarishi odamning ikkita virusni bir vaqtda yuqtirib olishi bilan ham bog‘liq bo‘lishi mumkin.
Izoh (0)