Шимолий Атлантика иттифоқи (НАТО)га аъзо давлатлар раҳбарлари Америка—Россия саммити олдидан АҚШ президенти Жо Байден билан маслаҳатлашмоқчи. Бу ҳақда ташкилот бош котиби Йенс Столтенберг маълум қилди, деб ёзади «РБК».
«Ишончим комилки, НАТО раҳбарлари Путин билан учрашув олдидан АҚШ президенти билан маслаҳатлашиш имкониятидан мамнун бўлади», — деди у.
Ташкилот бош котиби, шунингдек, Совуқ уруш давридан буён Россия ва НАТО ўртасидаги муносабатлар энг қуйи даражада эканини қайд этиб ўтди.
Унинг фикрича, НАТО саммитида иштирокчи мамлакатлар раҳбарлари Москва билан мулоқот ва тийилишни таъминлайдиган муносабатлар концепциясини қўллаб-қувватлашини яна бир бор тасдиқлаши керак.
Бош котибнинг сўзларига кўра, НАТО Россияни жиловлашга тайёр ва 2014 йилдан бери ҳар йили мудофаа бюджети учун харажатлар миқдорини ошириб келмоқда.
НАТО саммити 14 июнь куни Брюсселда бўлиб ўтади. Оқ уй баёнотида аниқлик киритилишича, иттифоқ Россиянинг «агрессив сиёсати»га қарши курашиш учун ўз стратегик концепциясини қайта кўриб чиқади.
Бир кун олдин Defense News портали АҚШ ва Европадаги манбаларига асосланиб, НАТОга аъзо давлатлар саммитдан сўнг Европада қуруқлик ядро қуролларини жойлаштиришдан бош тортишини эълон қилиши мумкинлиги ҳақида хабар берди. Нашрнинг аниқлик киритишича, бу АҚШ президенти Жо Байденнинг Россия президенти Владимир Путин билан учрашувидан олдин сиёсий зиддиятларни юмшатиш усулларидан биридир.
Жо Байден ва Владимир Путиннинг юзма-юз учрашуви 16 июнь куни Женевадаги La Grange вилласида бўлиб ўтади.
Изоҳ (0)