Андижонда онаси томонидан калтакланиб, тиланчилик қилишга мажбурлаб келингани айтилган бола воқеаси юзасидан тегровга қадар текширув бошлангани хабар берилганди. Бола манфаатларини кўзлаб, ушбу аёл оналик ҳуқуқидан маҳрум қилиниши мумкин.

Бош прокуратура матбуот хизматининг «Дарё» сўровига асосан маълум қилишича, 14 июнь куни вояга етмаган бола Қ.Т.нинг манфаатларини кўзлаб, Андижон туман халқ таълими бўлими, болаларни ижтимоий ҳимоялаш васийлик ва ҳомийлик органи томонидан «Оналик ҳуқуқидан маҳрум тўғрисида» ФИБ Андижон туманлараро судига даъво аризаси киритилди.

Айни пайтда бола Андижон вилояти тери-таносил касалликлари шифохонасида соғлиғини тиклаш мақсадида даволанмоқда. Шифокорлар томонидан унинг руҳий ҳолатини инобатга олган ҳолда ҳозирда тушунтириш олиш ва текширувга жалб этиш тавсия этилмаган. Иш ҳолатларидан келиб чиққан ҳолда вояга етмаган ушбу боладан психолог ва педагог иштирокида кейинчалик тушунтириш олиш мақсадга мувофиқ деб топилган.

Унинг баданида тан жароҳатлари ёки унинг излари мавжудлигига аниқлик киритиш мақсадида суд-тиббий экспертизаси тайинланиб, эксперт томонидан шифохонада кўрув ўтказилган.

3 июндаги дастлабки хулосада вояга етмаган Т.Қ.нинг баданида юз, бурун-оғиз тешиги атрофида тери касаллиги, бош қисмида кўплаб оч пушти рангли тери бутунлиги бузилгандан сўнг чандиқлар ҳамда киндик соҳаси тешиги юзасида катта юзали қизғиш рангли доғлар, ўнг думба юзаси ташқи квадратидаги қонталаш ва ўнг тирсак бўғими ташқи юзасида шилинма жароҳатлар мавжудлиги, касаллик тарихи ҳужжатларини ўрганиш якунлари бўйича эксперт хулосаси тайёрланиши қайд этилган.

Экспертнинг 13 июндаги хулосасида Қ.Т.нинг баданида юз, бурун-оғиз тешиги атрофида «тери касаллиги» ҳамда бош қисмида кўплаб оч пушти рангли тери бутунлиги бузилгандан сўнг чандиқлар, ҳар иккала кафт соҳаси ташқи юзаси терисида катта юзали қизғиш рангли доғлар, ўнг думба юзаси ташқи квадратидаги қонталаш ва ўнг тирсак бўғими ташқи юзасида шилинма жароҳатлар мавжудлиги, қўшимча касаллик тарихи ҳужжатларини ўрганиш якунлари бўйича эксперт хулосаси тугатилиши қайд этилган.

Бош прокуратуранинг билдиришича, олиб борилаётган терговга қадар текширув натижасига кўра қабул қилинган қарор юзасидан қўшимча равишда батафсил маълумот тақдим этилиши таъминланади.

Ҳозирда мазкур ҳолат юзасидан терговга қадар текширув ҳаракатлари шаҳар прокуратураси томонидан назоратга олинган ҳолда шаҳар ИИОФМБ томонидан олиб борилмоқда.