Rasmiy maqomi yo‘q kamar bilan ringga chiqqan Shohjahon, tizzalashni istamayotgan Yevro qatnashchilari, yulduzlarga to‘la UFC 263. Eng so‘nggi sport xabarlari dayjesti

Dunyo va o‘zbek sportiga oid 12-iyunning muhim xabarlari dayjesti bilan tanishing.

O‘zbekiston

Rasmiy maqomga ega bo‘lmagan kamar bilan ringga chiqqan Shohjahon Ergashev

Toshkentdagi shouda Shohjahon Ergashev ringga WBA International kamari bilan chiqib kelgan. Olamsport’ga ko‘ra bu kamar rasmiy maqomda emas. Ergashev bu kamarni 2018-yil 28-avgustida Jimin Vangga qarshi jangda qo‘lga kiritgan. Biroq 3 oydan ortiq vaqt davomida kamar uchun himoya jangi o‘tkazmaganligi tufayli 2019-yilning yanvar oyida kamar vakant qoldirilgan. Kamar nusxasi Ergashevda saqlanib qolgan.

Ayni paytda WBA International kamari Shahram G‘iyosovga tegishli. Shahram ushbu titulni amerikalik Emmanuel Teylor bilan jangda qo‘lga kiritgan.

Undan tashqari ushbu jang Salimu Jengoga tegishli bo‘lgan EBP kamari uchun ham bo‘lmagan. Insayder Jalol Ahmedovga ko‘ra bunga Salita Promotions bilan sud jarayonlari atrofidagi muammolar sabab qilib ko‘rsatilgan.

Ergashev Toshkentda o‘tgan shoudan keyin hakamlar qaroridan norozi ekanini Instagram’dagi sahifasi orqali ma’lum qildi.

Dzyudo

Vengriya poytaxti Budapesht shahrida o‘tkazilayotgan Jahon chempionatida O‘zbekiston terma jamoasi yakkalik bahslarida o‘z ishtirokini yakunladi. Avvalroq kumush medalni qo‘lga kiritgan Davlat Bobonov O‘zbekistoning ushbu musobaqadagi yagona sovrindori bo‘lib qoldi.

Futbol

JCh—2022 saralashi doirasida kechgan Yaman—O‘zbekiston o‘yinidan keyin har ikki tomon murabbiylari roziligi bilan matbuot anjumani bekor qilindi. Biroq Abramov O‘FA matbuot xizmatiga qisqa intervyu berdi. Mutaxassisning fikricha, musobaqada hech kimga oson bo‘lmayapti. Abramov Yamanga qarshi bahsda oson g‘alaba kutmagani va Saudiya ham Singapurni yutishga qiynalgani haqida fikr bildirdi (batafsil).

O‘zbekiston ayollar terma jamoasi o‘rtoqlik o‘yinida Eronni 5:0 hisobida taslim etdi. CAFA musobaqasida ishtirok etayotgan O‘zbekiston U-20 terma jamoasi qizlari esa Qirg‘iziston ustidan ishonchli g‘alabani qo‘lga kiritdi (3:1).

Jahon

Black Lives Matter’ni qo‘llab-quvvatlashni istamayotgan Yevro ishtirokchilari

Yevro—2020 ning ko‘plab qatnashchilar o‘yindan avval o‘tkaziladigan maxsus aksiyada ishtirok etishdan bosh tortmoqda. Vengiyaning ortidan Shotlandiya, Xorvatiya va  Niderlandiya terma jamoalari maydonda tizzalab o‘tirmasligini ma’lum qildi. Vengriya bosh vazirini buni chiroyli tushuntirdi: “Vengerlar faqat uch holatda tiz cho‘kadi: xudo oldida, vatan oldida va qaylig‘ini qo‘lini so‘rayotganda”.

Veynaldumni “PSJ”ga boy berib qo‘ygan “Barselona” Memfis Depayni ham qo‘ldan chiqarib yubormaslik harakatida

Katalonlar “Lion”ni erkin agent maqomida tark etgan Depay bilan muzokaralarni olib bormoqda. Diario Sport’ning xabar qilishicha, “Barsa” 27 yoshli futbolchiga “2+1” ko‘rinishidagi yaxshilangan shartnoma taklif qilmoqda. Avvalroq “Liverpul” sobiq vakili Jorjinyo Veynaldum katalon klubi bilan og‘zaki kelishuvi bo‘la turib, foydaliroq taklif bilan chiqqan “PSJ”ga o‘tib ketgandi.

Shuningdek, “Barselona” “Inter” hujumchisi Lautaro Martines transferi ustida ham ishlamoqda. “Ko‘k-anorranglilar” kelishuvga “Betis”dan qaytgan Emerson Aparesidoni qo‘shmoqchi. Milanliklar unga yozgi transfer oynasida jamoani tark etishi kutilayotgan Ashraf Hakimining o‘rinbosari sifatida qaramoqda.

“Milan” Ibrahimovichga sherik va o‘rinbosar qidiryapti

“Milan” yangi mavsum oldidan o‘z safida markaziy hujumchi bilan kuchaytirmoqchi. “Chelsi” forvardi Olivye Jiru bilan muzokara olib borayotgan milanliklar Zlatanning jarohati sabab, yana bir hujumchi olib kelish haqida o‘ylamoqda. “Milan” short-listidan “PSJ” vakili Mauro Ikardi va “Zenit” futbolchisi Sardor Azmun bor, deya xabar qilmoqda La Gazzetta dello Sport.

“Manchester Yunayted” “Borussiya D” bilan savdolashmoqda

Mankunianlar Jeydon Sancho transferiga yana qaytdi. Inglizlar Sancho uchun 75 million funt (87 mln yevro) taklif qilmoqda. Nemislar esa 87 mln funt (100 mln yevro) xohlamoqda. 2020/21-yilgi mavsum yakunlanishi arafasida muxlislarning jiddiy e’tirozi va tahdidlariga duch kelgan Gleyzerlar katta ehtimol bilan bu yozda katta xaridlarga qo‘l uradi.

UFC

Yakshanba tongida yulduzlar ishtirokidagi janglarga to‘lgan UFC musobaqasi bo‘lib o‘tadi

Toshkent vaqti bilan 13-iyun tongida AQShda UFC 263 oqshomi bo‘lib o‘tadi. Kechaning asosiy jangi o‘rta vazn toifasi chempioni Israel Adesanya va Marvin Vettori o‘rtasida kechadi. Mutlaq yengil vazn chempionligi uchun kechadigan Deyvison Figeredo — Brendon Moreno revansh jangi ham qiziqarli o‘tishi tayin. Shuningdek, bu musobaqada Neyt Diaz va Demian Mayya kabi yulduzlar oktagonga qaytadi.

UFC 263 musobaqasidagi janglar videosini bu yerda tomosha qilish mumkin — havola.

Maxachevning navbatdagi jangi tasdiqlandi

Yengil vazn toifasida harakat qilayotgan Islom Maxachevning UFC’dagi navbatdagi jangi sanasi tasdiqlandi. Rossiyalik yakkakurashchi 17-iyul kuni Tiago Moyzesga qarshi jang qiladi.