Futbol bo‘yicha O‘zbekiston milliy terma jamoasi JCh—2022 musobaqasi saralashi doirasida 11-iyun, juma kuni Yaman termasini mag‘lubiyatga uchratdi (1:0). O‘zbekiston terma jamoasi bosh murabbiyi Vadim Abramov ushbu uchrashuv haqidagi fikrlarini bildirdi.
O‘yin biz kutgandek qiyin kechdi. Hozir barcha o‘yinlar shunday bo‘lishini bilaman. Kimdir biz osongina g‘alaba qozonamiz deb o‘ylagandir, ammo bunday bo‘lmasligi aniq edi. Yaman oxirgi o‘yinida mag‘lubiyatga uchragani hech nimani bildirmaydi. Undan tashqari bu jamoa Saudiya Arabistoni bilan durang natija qayd etgan. Biz o‘z o‘yinimizni qila olmadik, ularga moslashishga harakat qildik. Albatta, jamoa raqibdan kelib chiqib o‘yin ko‘rsatadi. Endi xulosalar chiqarishimiz lozim. Bilishimcha, Saudiya Arabistoniga ham oson bo‘lmagan, 85-daqiqagacha hisob ochilmaganidan xabarim bor.O‘zbekiston so‘nggi tur oldidan 15 ochko bilan 2-o‘rinda qolmoqda, jamoa keyingi o‘yinni peshqadam Saudiya Arabistoniga (17) qarshi o‘tkazadi.Iqlim bilan bog‘liq muammolarni ham hisobga olish kerak. Hozir hammaga qiyin. Biz tezroq o‘zimizga kelib, Saudiya Arabistoniga qarshi o‘yinga tayyorgarlik ko‘rishimiz kerak. O‘zimiz xohlagan o‘yinni ko‘rsata olmadik. Afsuski, raqibdan kelib chiqib o‘ynashga majbur bo‘ldik. To‘p uzatishda juda ko‘p xatolarga yo‘l qo‘ydik. O‘zimizni uslubimizdagi futbolni ko‘rsata olmadik. Bizda o‘yinni hal qilish uchun vaziyatlar bo‘ldi. Agar ulardan foydalanganimizda xotirjamroq harakat qilardik. Lekin raqib darvozaboni yaxshi o‘ynadi.
Futbolchilardan xursandman, shunday o‘yinda hisobni ushlab qola oldi. Juda qaltis hisob edi, oxirgi daqiqalar yuqori bosim bilan o‘tdi. Ammo vazifani bajardik. Biz Saudiya Arabistoniga qarshi o‘yingacha xatoga yo‘l qo‘ymasdan yetib borishimiz lozim edi. Endi o‘sha o‘yinga jiddiy tayyorgarlik ko‘rishimiz kerak.
Jaloliddin Masharipovning sariq kartochkasi? U 90 daqiqa o‘ynashi kerak edi. Lekin o‘z darajasidagi o‘yinini namoyish etolmadi. Shunga qaramay uni o‘yin oxirigacha maydonda qoldirdik. Uning aqlli yigit ekani va sariq kartochka olmasligiga ishonchim komil edi.
Umarbek Eshmurodov birinchi bo‘limda ishonchsiz harakat qildi va juda hayajonlanayotgani sezildi. Shuning uchun ikkinchi bo‘limda tajribaliroq bo‘lgan Ashurmatovni tushirdim va u ishonchliroq harakat qildi.
Vadim Abramov, O‘zbekiston terma jamoasi bosh murabbiyi
Yaman — O‘zbekiston uchrashuvi videosharhini bu yerda tomosha qilish mumkin — video.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)