Расмий мақоми йўқ камар билан рингга чиққан Шоҳжаҳон, тиззалашни истамаётган Евро қатнашчилари, юлдузларга тўла UFC 263. Энг сўнгги спорт хабарлари дайжести

Дунё ва ўзбек спортига оид 12 июннинг муҳим хабарлари дайжести билан танишинг.

Ўзбекистон

Расмий мақомга эга бўлмаган камар билан рингга чиққан Шоҳжаҳон Эргашев

Тошкентдаги шоуда Шоҳжаҳон Эргашев рингга WBA International камари билан чиқиб келган. Оламспорт’га кўра бу камар расмий мақомда эмас. Эргашев бу камарни 2018 йил 28 августида Жимин Вангга қарши жангда қўлга киритган. Бироқ 3 ойдан ортиқ вақт давомида камар учун ҳимоя жанги ўтказмаганлиги туфайли 2019 йилнинг январь ойида камар вакант қолдирилган. Камар нусхаси Эргашевда сақланиб қолган.

Айни пайтда WBA International камари Шаҳрам Ғиёсовга тегишли. Шаҳрам ушбу титулни америкалик Эммануэль Тэйлор билан жангда қўлга киритган.

Ундан ташқари ушбу жанг Салиму Женгога тегишли бўлган EBP камари учун ҳам бўлмаган. Инсайдер Жалол Аҳмедовга кўра бунга Салита Промотионс билан суд жараёнлари атрофидаги муаммолар сабаб қилиб кўрсатилган.

Эргашев Тошкентда ўтган шоудан кейин ҳакамлар қароридан норози эканини Instagram’даги саҳифаси орқали маълум қилди.

Дзюдо

Венгрия пойтахти Будапешт шаҳрида ўтказилаётган Жаҳон чемпионатида Ўзбекистон терма жамоаси яккалик баҳсларида ўз иштирокини якунлади. Аввалроқ кумуш медални қўлга киритган Давлат Бобонов Ўзбекистонинг ушбу мусобақадаги ягона совриндори бўлиб қолди.

Футбол

ЖЧ—2022 саралаши доирасида кечган Яман—Ўзбекистон ўйинидан кейин ҳар икки томон мураббийлари розилиги билан матбуот анжумани бекор қилинди. Бироқ Абрамов ЎФА матбуот хизматига қисқа интервью берди. Мутахассиснинг фикрича, мусобақада ҳеч кимга осон бўлмаяпти. Абрамов Яманга қарши баҳсда осон ғалаба кутмагани ва Саудия ҳам Сингапурни ютишга қийналгани ҳақида фикр билдирди (батафсил).

Ўзбекистон аёллар терма жамоаси ўртоқлик ўйинида Эронни 5:0 ҳисобида таслим этди. CAFA мусобақасида иштирок этаётган Ўзбекистон U-20 терма жамоаси қизлари эса Қирғизистон устидан ишончли ғалабани қўлга киритди (3:1).

Жаҳон

Black Lives Matter’ни қўллаб-қувватлашни истамаётган Евро иштирокчилари

Евро—2020 нинг кўплаб қатнашчилар ўйиндан аввал ўтказиладиган махсус акцияда иштирок этишдан бош тортмоқда. Венгиянинг ортидан Шотландия, Хорватия ва  Нидерландия терма жамоалари майдонда тиззалаб ўтирмаслигини маълум қилди. Венгрия бош вазирини буни чиройли тушунтирди: «Венгерлар фақат уч ҳолатда тиз чўкади: худо олдида, ватан олдида ва қайлиғини қўлини сўраётганда».

Вейналдумни «ПСЖ»га бой бериб қўйган «Барселона» Мемфис Депайни ҳам қўлдан чиқариб юбормаслик ҳаракатида

Каталонлар «Лион»ни эркин агент мақомида тарк этган Депай билан музокараларни олиб бормоқда. Diario Sport'нинг хабар қилишича, «Барса» 27 ёшли футболчига «2+1» кўринишидаги яхшиланган шартнома таклиф қилмоқда. Аввалроқ «Ливерпуль» собиқ вакили Жоржиньо Вейналдум каталон клуби билан оғзаки келишуви бўла туриб, фойдалироқ таклиф билан чиққан «ПСЖ»га ўтиб кетганди.

Шунингдек, «Барселона» «Интер» ҳужумчиси Лаутаро Мартинес трансфери устида ҳам ишламоқда. «Кўк-анорранглилар» келишувга «Бетис»дан қайтган Эмерсон Апаресидони қўшмоқчи. Миланликлар унга ёзги трансфер ойнасида жамоани тарк этиши кутилаётган Ашраф Ҳакимининг ўринбосари сифатида қарамоқда.

«Милан» Ибраҳимовичга шерик ва ўринбосар қидиряпти

«Милан» янги мавсум олдидан ўз сафида марказий ҳужумчи билан кучайтирмоқчи. «Челси» форварди Оливье Жиру билан музокара олиб бораётган миланликлар Златаннинг жароҳати сабаб, яна бир ҳужумчи олиб келиш ҳақида ўйламоқда. «Милан» шорт-листидан «ПСЖ» вакили Мауро Икарди ва «Зенит» футболчиси Сардор Азмун бор, дея хабар қилмоқда La Gazzetta dello Sport.

«Манчестер Юнайтед» «Боруссия Д» билан савдолашмоқда

Манкунианлар Жейдон Санчо трансферига яна қайтди. Инглизлар Санчо учун 75 миллион фунт (87 млн евро) таклиф қилмоқда. Немислар эса 87 млн фунт (100 млн евро) хоҳламоқда. 2020/21 йилги мавсум якунланиши арафасида мухлисларнинг жиддий эътирози ва таҳдидларига дуч келган Глейзерлар катта эҳтимол билан бу ёзда катта харидларга қўл уради.

UFC

Якшанба тонгида юлдузлар иштирокидаги жангларга тўлган UFC мусобақаси бўлиб ўтади

Тошкент вақти билан 13 июнь тонгида АҚШда UFC 263 оқшоми бўлиб ўтади. Кечанинг асосий жанги ўрта вазн тоифаси чемпиони Исраэл Адесаня ва Марвин Веттори ўртасида кечади. Мутлақ енгил вазн чемпионлиги учун кечадиган Дейвисон Фигередо — Брендон Морено реванш жанги ҳам қизиқарли ўтиши тайин. Шунингдек, бу мусобақада Нейт Диаз ва Демиан Майя каби юлдузлар октагонга қайтади.

UFC 263 мусобақасидаги жанглар видеосини бу ерда томоша қилиш мумкин — ҳавола.

Махачевнинг навбатдаги жанги тасдиқланди

Енгил вазн тоифасида ҳаракат қилаётган Ислом Махачевнинг UFC’даги навбатдаги жанги санаси тасдиқланди. Россиялик яккакурашчи 17 июль куни Тиаго Мойзесга қарши жанг қилади.