Rossiya bosh vaziri Mixail Mishustin Rossiya va AQSh hukumatlari o‘rtasida “ochiq quruqlik”ka oid o‘zaro kelishuv memorandumini bekor qilish to‘g‘risida qarorni imzoladi. Qaror Tashqi ishlar vazirligining taklifiga binoan qabul qilindi, deb yozadi “RBK”.
Memorandum 1992-yildan beri amal qilib kelayotgandi. U yopiq zonalar tushunchasini bekor qilish va har ikki mamlakat diplomatlariga erkin harakatlanish uchun cheklovlarni olib tashlashni nazarda tutadi. Kirish uchun maxsus talablar bo‘lmagan taqdirda, diplomatlar har ikki mamlakatning aksariyat hududlariga bemalol tashrif buyurishi mumkin edi. Shuningdek, ulardan safarlar uchun ruxsat olish talab etilmasdi.
AQShning yangi sanksiyalariga javoban Tashqi ishlar vazirligi aprel oyida ham memorandumni bekor qilish rejalarini e’lon qilgan edi. Vazirlik AQSh elchixonasi tomonidan Davlat departamenti liniyasi bo‘yicha qisqa xizmat safariga yuborilayotganlarga ko‘maklashish amaliyotini cheklashga qaror qildi. Amerikalik diplomatlarga tegishli vizalarni berish minimallashtiriladi: o‘zaro manfaatlar asosida bir yilda o‘n kishigacha viza beriladi.
Aprel oyida Vashington Moskvaga qarshi yangi sanksiyalarni e’lon qildi. Xususan, AQSh o‘n nafar rossiyalik diplomatni chiqarib yubordi, mamlakat rasmiylarining fikricha, ularning orasida Rossiya maxsus xizmatlari xodimlari bo‘lgan.
Izoh (0)