Sirdaryodagi daladan butunlay yonib ketgan erkak jasadi topilib, holat yuzasidan jinoyat ishi qo‘zg‘atilgandi. Bosh prokuratura matbuot xizmati ushbu jinoyat yuzasidan yangi tafsilotlarni ma’lum qildi.
Qayd etilishicha, qotillik alomatlari (yonib ketgan) bo‘lgan noma’lum shaxs murdasi bilan birga Cobalt avtomashinasi ham topilgan. Noma’lum murda mazkur avtomobilni ijara shartnomasi asosida haydab yurgan fuqaro F.P. ekanligi taxmin qilingan. Biroq jinoyat joyi ko‘zdan kechirilganda o‘sha yerda yotgan aroq shishasi idishidan boshqa bir shaxs — rus millatiga mansub S.S.ning barmoq izlari aniqlangan.
Shundan so‘ng S.S.ning onasi va ukasi so‘roq qilingan. Yaqinlari tomondan marhumning doimiy ish joyi yo‘qligi, qurilish ishlarida yollanma ishchi bo‘lib ishlab yurishi, muqaddam o‘g‘irlik bilan sudlangani, muntazam ravishda spirtli ichimlik iste’mol qilishi, voqea sodir bo‘lgan kuni uydan chiqib ketib, qaytib kelmagani bildirilgan.
Olib borilgan tezkor surishtiruv harakatlari davomida marhum deb taxmin qilingan F.P. aslida tirik bo‘lib, Ohangaron shahrida yashirinib yurganligi aniqlangan. Huquqni muhofaza qiluvchi organlar xodimlari tomonidan o‘tkazilgan tezkor qidiruv tadbirlari natijasida Ohangaron shahridagi xonadonlarning birida yashiringan F.P. ushlangan.
Jinoyat ishi bo‘yicha so‘roq qilingan F.P. o‘z aybiga iqror bo‘lib, bergan ko‘rsatmasida Cobalt’da Toshkent shahar hududida kirakashlik qilib yurganida ayrim fuqarolardan 4,1 ming dollarni aldab olgani, qarz bo‘lib qolgani, ularni qaytarishning imkoni bo‘lmagani sababli notanish shaxsni o‘ldirib, o‘zini o‘ldiga chiqarib ko‘rsatish rejasini tuzganini bildirgan.
F.P. 2021-yil 28-may kuni Uchtepa tumani 20-mavzeda baklashka terib yurgan rus millatiga mansub, o‘ziga notanish shaxs S.S.ni ko‘rib, unga ish taklif qilib, o‘zining boshqaruvidagi Cobalt’ga o‘tqazib, do‘kondan olingan aroqni ichirib, Sirdaryo viloyati hududidagi ovloqroq joyga olib kelgan hamda o‘ta shafqatsizlik bilan qasddan o‘ldirgan.
Xabarda aytilishicha, hozirda gumonlanuvchi protsessual tartibda ushlangan, tergov harakatlari davom etmoqda.
Izoh (0)