Сирдарёдаги даладан бутунлай ёниб кетган эркак жасади топилиб, ҳолат юзасидан жиноят иши қўзғатилганди. Бош прокуратура матбуот хизмати ушбу жиноят юзасидан янги тафсилотларни маълум қилди.
Қайд этилишича, қотиллик аломатлари (ёниб кетган) бўлган номаълум шахс мурдаси билан бирга Cobalt автомашинаси ҳам топилган. Номаълум мурда мазкур автомобилни ижара шартномаси асосида ҳайдаб юрган фуқаро Ф.П. эканлиги тахмин қилинган. Бироқ жиноят жойи кўздан кечирилганда ўша ерда ётган ароқ шишаси идишидан бошқа бир шахс — рус миллатига мансуб С.С.нинг бармоқ излари аниқланган.
Шундан сўнг С.С.нинг онаси ва укаси сўроқ қилинган. Яқинлари томондан марҳумнинг доимий иш жойи йўқлиги, қурилиш ишларида ёлланма ишчи бўлиб ишлаб юриши, муқаддам ўғирлик билан судлангани, мунтазам равишда спиртли ичимлик истеъмол қилиши, воқеа содир бўлган куни уйдан чиқиб кетиб, қайтиб келмагани билдирилган.
Олиб борилган тезкор суриштирув ҳаракатлари давомида марҳум деб тахмин қилинган Ф.П. аслида тирик бўлиб, Оҳангарон шаҳрида яшириниб юрганлиги аниқланган. Ҳуқуқни муҳофаза қилувчи органлар ходимлари томонидан ўтказилган тезкор қидирув тадбирлари натижасида Оҳангарон шаҳридаги хонадонларнинг бирида яширинган Ф.П. ушланган.
Жиноят иши бўйича сўроқ қилинган Ф.П. ўз айбига иқрор бўлиб, берган кўрсатмасида Cobalt’да Тошкент шаҳар ҳудудида киракашлик қилиб юрганида айрим фуқаролардан 4,1 минг долларни алдаб олгани, қарз бўлиб қолгани, уларни қайтаришнинг имкони бўлмагани сабабли нотаниш шахсни ўлдириб, ўзини ўлдига чиқариб кўрсатиш режасини тузганини билдирган.
Ф.П. 2021 йил 28 май куни Учтепа тумани 20-мавзеда баклашка териб юрган рус миллатига мансуб, ўзига нотаниш шахс С.С.ни кўриб, унга иш таклиф қилиб, ўзининг бошқарувидаги Cobalt’га ўтқазиб, дўкондан олинган ароқни ичириб, Сирдарё вилояти ҳудудидаги овлоқроқ жойга олиб келган ҳамда ўта шафқатсизлик билан қасддан ўлдирган.
Хабарда айтилишича, ҳозирда гумонланувчи процессуал тартибда ушланган, тергов ҳаракатлари давом этмоқда.
Изоҳ (0)