EastFruit nashri ma’lumotlariga ko‘ra, O‘zbekistonda gilos terimi mavsumi yakunlanishiga uzog‘i bilan 7—10 kun qolgan. Mamlakatda 2021-yilgi gilos mavsumi boshida narxlar o‘tgan yilgiga nisbatan ancha yuqori narxda boshlanganiga qaramay, ayni vaqtda ushbu mevaning narxi 2020-yilning mos davriga yaqinlashib qolmoqda.
Nashr ekspertlarining hisoblashicha, gilos narxi bundan keyin ham tushib boradi. Bundan tashqari, narx pasayishi shu yo‘sinda ketaversa, mavsum oxiriga borib gilosning ulgurji narxi 2020-yilning 10—15-iyunlariga qaraganda ham arzonlashib ketishi mumkin. Boshqacha aytganda, juda yuqori narxlar bilan boshlangan 2021-yilgi masum juda arzon narxlar bilan yakunlanishi mumkin.
Eslatib o‘tamiz, 2021-yilda O‘zbekistondagi mavsum o‘tgan yilgiga nisbatan 10 kun keyinroq boshlangan, giloslarning birinchi ulgurji partiyasini narxlari 2020-yil bilan taqqoslaganda 35 foiz qimmatroq sotilgan.
2021-yilning 27-may holatiga ko‘ra, 26 millimetr kalibrdan kichiroq giloslar narxi 25 foiz, yirik kalibrlisi esa 46 foiz qimmatroq. Biroq bir hafta ichida gilosning ulgurji narxi o‘tgan yilgiga tenglashib qolgan.
O‘zbekistonda gilos narxi nima sababdan keskin tushib ketdi?
O‘zbekistonlik bog‘bonlarning so‘zlariga ko‘ra, so‘nggi 5—6 kun ichida gilosga bo‘lgan talab kamaygan. 4-iyun holati bo‘yicha Farg‘ona viloyatida (gilos ishlab chiqaruvchi yirik viloyatlardan biri) fermerlarga treyderlar tomonidan taklif etilayotgan narx quyidagicha: sortirovga qilinmagan gilosning kilosi uchun 0,50—0,66 dollar va kalibrlari hamda nuqsonlari bilan sortlarga ajratilgan bir kilogramm gilos uchun — 0,95 dollar atrofida.
Treyderlardan birining ta’kidlashicha, Rossiya bozorida gilosga bo‘lgan talabning tushib ketishiga, mamlakatga Turkiya, Eron va Ozarbayjon tomonidan yetkazib berish keskin oshgani sabab bo‘lmoqda. Aftidan, bu O‘zbekistonning ichki bozoridagi gilos narxiga ham bosim o‘tkazmoqda, chunki bozorga ushbu mevalar ko‘p kela boshlagan.
EastFruit ekspertlarining fikricha, O‘zbekistonda gilos narxining arzonlashuvi prognozlari iste’molchilarni xursand qiladi, biroq bog‘bonlarni emas. Ob-havo ma’lumotlariga ko‘ra, 4—12-iyun oralig‘ida Farg‘ona viloyatida o‘rtacha havo harorati Selsiy bo‘yicha 39 darajaga yetadi, bu 2020-yilning mos davriga nisbatan 9 darajaga yuqori demak. Bu esa giloslarning tezroq yetilishi va ularning terimini tezlashtirishga olib keladi.
Shuni ham hisobga olish kerakki, issiq ob-havo mevalarning tezroq buzilishiga olib keladi, chunki gilosni tez sovutish uchun uskunalar bilan ta’minlash ishlari O‘zbekistonda juda past darajada qolmoqda.
Bu omillarning barchasi, eksport qiluvchilarning sust talablari bilan birgalikda narxga bosim o‘tkazadi. Eksportchilar gilosni O‘zbekiston uchun asosiy savdo bozori bo‘lgan Rossiya bozoriga sotish uchun uning narxini pasaytirishga to‘g‘ri keladi.
Izoh (0)