Ichki ishlar vazirligi axborot xizmati ijtimoiy tarmoqlarda “Bozorlardan birida ayol kishi bir necha erkak tomonidan ayovsiz tahqirlandi” nomi ostida tarqalgan videotasvir yuzasidan bayonot berdi.
Ma’lum qilinishicha, 2021-yil 5-iyun kuni Yangiqo‘rg‘on tumanida yashovchi, spirtli ichimlikka ruju qo‘ygan va janjalkash shaxs sifatida tuman IIBning profilaktik hisobida turuvchi G.T. ismli ayol Chortoq tumaniga mast holda borib, shahar avtoshoh bekatida hech qanday sababsiz janjal ko‘targan va hududdagi do‘kon hamda boshqa obyektlarning oynalarini sindirib, do‘konlarga ziyon, o‘ziga esa tan jarohati yetkazgan.
Shu yerda ishlovchi somsapazning idishlarini ham sindirib tashlagandan so‘ng 1988-yilda tug‘ilgan somsapaz X.Yu. ayolga bu yerdan ketishini tushuntirgan, biroq ayol spirtli ichimlik talab qilib, janjal ko‘tarishda davom etgan.
Shundan so‘ng X.Yu. ayolning sochidan tortib, uni bekatdan tashqariga olib chiqish uchun sudragan.
IIV axborot xizmati xabariga ko‘ra, hozirda holat yuzasidan tergovga qadar tekshiruv harakatlari olib borilmoqda. Fuqaro X.Yu. esa vaqtincha ma’muriy tartibda ushlangan.
“Surishtiruv ishlari yakuniga yetgach, holat yuzasidan qo‘shimcha ma’lumot beriladi”, — deyiladi xabarda.
Avvalroq Surxondaryoda uy masalasida qo‘shni ayolni kaltaklagan erkak jarimaga tortilgani, Chiroqchida noma’lum shaxs hokimlik binosi oldida bir qizni kaltaklagani to‘g‘risida xabar berilgandi.
Izoh (0)