Samarqand va Samarqand viloyatining boshqa bir qator tumanlari aholisi suv ta’minotidagi uzilishlarga duch kelmoqda. “Samarqand suv ta’minoti” korxonasi “bu yilgi tabiiy qurg‘oqchilik” haqida xabar berdi.
Samarqand viloyati aholisining toza ichimlik suvi ta’minoti yerosti suv zaxiralari hisobidan “Samarqand suv ta’minoti” korxonasiga qarashli suv inshootlari tomonidan amalga oshiriladi. “Samarqand suv ta’minoti” ma’lumotlariga ko‘ra, hozirda yog‘ingarchiliklarning yo‘qligi va Zarafshon daryosi o‘zanida suv oqimining kamligi sababli yerosti suvlarining sathi (debiti) pastlashib ketgan.
Natijada inshootlardagi nasos uskunalarining mo‘tadil ishlashida yerosti suvi zaxirasining yetishmasligi sababli Samarqand, Kattaqo‘rg‘on shaharlari, Pastdarg‘om, Nurobod, Ishtixon, Kattaqo‘rg‘on, Paxtachi, Narpay, Payariq va Oqdaryo tumanlari aholisini toza ichimlik suvi ta’minotida uzilishlarni olib kelmoqda.
“ ‘Samarqand suv ta’minoti’ MChJ ma’muriyati markazlashgan ichimlik suvi iste’molchilaridan 2021-yilning tabiiy qurg‘oqchiligi sababli suv ta’minotida kuzatilayotgan kamchiliklar — suv yetishmovchiligi uchun o‘zining uzrini bildiradi va mazkur muammo tez orada o‘z yechimini topadi. Shu bilan birga, korxona ma’muriyati iste’molchilardan ichimlik suvidan maqsadli foydalanish, uni behuda isrofgarchiliklariga yo‘l qo‘ymasliklarini so‘raydi”, — deyiladi xabarda.
Eslatib o‘tamiz, 2021-yilning fevral oyi oxirida Prezident yig‘ilishida 2021-yilgi sug‘orish mavsumida suv ta’minoti 25 foizga pastroq bo‘lishi ma’lum qilingan edi. 1-oktabrgacha suvni tejaydigan texnologiyalar uchun polietilen va polipropilendan olinadigan boj bekor qilindi. 10 milliard kubometr suvni tejash mas’uliyati bosh vazir o‘rinbosari Shuhrat G‘aniyev, suv xo‘jaligi vazirligi rahbari va hokimlarga yuklatilgan edi.
Mavzuga doir: O‘zbekistonda qishloq xo‘jaligi ekinlarini sug‘orish uchun suv olish limitlari tasdiqlandi
2020-yilning 10-iyulida esa Prezidentning “O‘zbekiston Respublikasi suv xo‘jaligini rivojlantirishning 2020—2030-yillarga mo‘ljallangan konsepsiyasini tasdiqlash to‘g‘risida”gi farmoni imzolangandi.
Izoh (0)