“Real” yozda uch nafar yulduz bilan xayrlashadi

“Real” futbolchilari Isko, Marselo va Garet Beyl yozda jamoani tark etishi mumkin. Bu haqda Marca xabar bermoqda.

Qayd etilishicha, Madrid klubi ushbu futbolchilarni boshqa jamoalarga sotib yubormoqchi. Karlo Anchelottining bosh murabbiy etib tayinlanishi ham ularning jamoadagi holatiga ta’sir ko‘rsata olmasligi aytilmoqda.

Agar uchala futbolchi jamoadan ketadigan bo‘lsa, klub ularga to‘lanayotgan maoshdan 50 million yevrogacha mablag‘ tejab qolishi mumkin. Ta’kidlash joiz, futbolchilar ortda qolgan 2020/21-yilgi mavsumda kam o‘yin amaliyotiga ega bo‘ldi.

Shuningdek, jamoa sardori Serxio Ramos bilan o‘tkazilayotgan muzokaralar ham boshi berk ko‘chaga kirib qolgan. U ham katta ehtimol bilan yozda jamoadan ketadi.

Ma’lumot uchun, Isko, Marselo va Beylning “Real” bilan shartnomalari 2022-yilda o‘z nihoyasiga yetadi.