Ukrainadagi SkyUp xususiy aviakompaniya Kiyev va Toshkent o‘rtasida to‘g‘ridan to‘g‘ri reyslarni yo‘lga qo‘yadi. Bu haqda aviakompaniya matbuot xizmatiga tayanib, Spot xabar berdi.
Qayd etilishicha, reyslar har hafta chorshanba kunlari amalga oshiriladi. Kompaniya saytida 9-iyundan 27-oktabrgacha amalga oshiriladigan aviaparvozlar ro‘yxati keltirilgan.
Aviachipta narxlari 2-iyun holatiga ko‘ra quyidagicha:
- Kiyev—Toshkent 6559 grivnadan boshlab (taxminan, 2,5 million so‘m);
- Toshkent—Kiyev 7931 grivnadan boshlab (taxminan, 3 million so‘m).
O‘zbekiston va Ukraina o‘rtasida to‘g‘ridan to‘g‘ri doimiy parvozlarni tiklash masalasi uzoq vaqtdan beri muhokama qilib kelinmoqda. Uzbekistan Airways Toshkent—Kiyev—Toshkent yo‘nalishida parvozlarni amalga oshirishni 2015-yilning may oyida to‘xtatgan, o‘sha yilning sentabr oyida esa Ukraina poytaxtidagi ofisini yopgan.
O‘shanda “Ukraina xalqaro avialiniyalari” (MAU) kompaniyasi ham mazkur yo‘nalishdagi parvozlarini to‘xtatgan — mojaro Ukraina aviakompaniyasining ehtimoliy ustunligidan kelib chiqqan, u Borispol aeroporti orqali amalga oshiriladigan tranzit yordamida yo‘lovchi oqimining bir qismini olib qo‘ygan.
O‘zbekiston Ukraina kompaniyasidan parvozlar chastotasini haftasiga ikkitadan bittaga kamaytirishni talab qilgan, buning oqibatida “Ukraina xalqaro avialiniyalari”ning tranzit modeli samarali ishlashdan to‘xtashi mumkin edi. “Ukraina xalqaro avialiniyalari” parvozlar chastotasini kamaytirishga rozi bo‘lmagan, buning oqibatida ikki mamlakat o‘rtasidagi to‘g‘ridan to‘g‘ri aviaqatnovlar to‘xtatilgan.
Har ikki davlat to‘g‘ridan to‘g‘ri parvozlarni 2021-yil may oyida tiklashi haqida transport vaziri, Uzbekistan Airways raisi Ilhom Mahkamov 28-aprel kuni bo‘lib o‘tgan matbuot anjumanida ma’lum qilgandi.
Izoh (0)