Украинадаги SkyUp хусусий авиакомпания Киев ва Тошкент ўртасида тўғридан-тўғри рейсларни йўлга қўяди. Бу ҳақда авиакомпания матбуот хизматига таяниб, Spot хабар берди.
Қайд этилишича, рейслар ҳар ҳафта чоршанба кунлари амалга оширилади. Компания сайтида 9 июндан 27 октябргача амалга ошириладиган авиапарвозлар рўйхати келтирилган.
Авиачипта нархлари 2 июнь ҳолатига кўра қуйидагича:
- Киев—Тошкент 6559 гривнадан бошлаб (тахминан, 2,5 миллион сўм);
- Тошкент—Киев 7931 гривнадан бошлаб (тахминан, 3 миллион сўм).
Ўзбекистон ва Украина ўртасида тўғридан-тўғри доимий парвозларни тиклаш масаласи узоқ вақтдан бери муҳокама қилиб келинмоқда. Uzbekistan Airways Тошкент—Киев—Тошкент йўналишида парвозларни амалга оширишни 2015 йилнинг май ойида тўхтатган, ўша йилнинг сентябрь ойида эса Украина пойтахтидаги офисини ёпган.
Ўшанда «Украина халқаро авиалиниялари» (МАУ) компанияси ҳам мазкур йўналишдаги парвозларини тўхтатган — можаро Украина авиакомпаниясининг эҳтимолий устунлигидан келиб чиққан, у Бориспол аэропорти орқали амалга ошириладиган транзит ёрдамида йўловчи оқимининг бир қисмини олиб қўйган.
Ўзбекистон Украина компаниясидан парвозлар частотасини ҳафтасига иккитадан биттага камайтиришни талаб қилган, бунинг оқибатида «Украина халқаро авиалиниялари»нинг транзит модели самарали ишлашдан тўхташи мумкин эди. «Украина халқаро авиалиниялари» парвозлар частотасини камайтиришга рози бўлмаган, бунинг оқибатида икки мамлакат ўртасидаги тўғридан-тўғри авиақатновлар тўхтатилган.
Ҳар икки давлат тўғридан-тўғри парвозларни 2021 йил май ойида тиклаши ҳақида транспорт вазири, Uzbekistan Airways раиси Илҳом Маҳкамов 28 апрель куни бўлиб ўтган матбуот анжуманида маълум қилганди.
Изоҳ (0)