O‘zbekiston Prezidenti Shavkat Mirziyoyev 3-iyun kuni Qozog‘iston prezidenti Qosim-Jo‘mart To‘qayev bilan telefon orqali muloqot qildi.
Ikki tomonlama va mintaqaviy hamkorlikning dolzarb masalalari muhokama qilindi.
Davlat rahbarlari Nur-Sulton shahrida o‘tgan ikki mamlakat bosh vazirlari uchrashuvining samarali natijalarini yuksak baholadi.
Savdo va logistika, sanoat kooperatsiyasi sohalarida, zamonaviy transport kommunikatsiyalari va turizm infratuzilmasini rivojlantirish bo‘yicha ustuvor loyihalarni ilgari surishga alohida e’tibor qaratildi.
Shuningdek, prezidentlar parlamentlararo almashinuv kengayib borayotgani hamda ayni kunlarda Toshkent shahrida Senat rahbarlari darajasidagi qo‘shma komissiyaning birinchi yig‘ilishi o‘tkazilayotganini mamnuniyat bilan qayd etdi.
Yetakchilar Markaziy Osiyoda do‘stlik va yaxshi qo‘shnichilik munosabatlarini mustahkamlash, shuningdek, Afg‘onistondagi vaziyatni tinch yo‘l bilan hal etish masalalari yuzasidan fikr almashdi.
Bundan tashqari, bo‘lajak oliy darajadagi uchrashuvlar rejasi ko‘rib chiqildi.
Bundan avval Qozog‘iston prezidenti Abdulla Aripovni “Do‘stlik” ordeni bilan taqdirlagani hamda Shavkat Mirziyoyev Qozog‘iston prezidenti Qosim-Jo‘mart To‘qayevni tug‘ilgan kuni bilan tabriklagani haqida xabar berilgandi.
Izoh (0)