Prezident Shavkat Mirziyoyev 31-may kuni turizm, shahar infratuzilmasi va sanoat sohalaridagi loyihalar borasida amalga oshirilayotgan ishlar taqdimoti bilan tanishdi. Bu haqda davlat rahbarining matbuot xizmati xabar berdi.
Taqdim etilgan loyihalardan biri — Toshkent xalqaro aeroportidan shahar markaziga o‘tishdagi ko‘prikni kengaytirishga qaratilgan. Hozirgi yo‘l o‘tkazgich 1967-yilda qurilgan va 2008-yilda kengaytirilgan.
“Poytaxtimiz rivojlanishi va transportlar soni oshishi bilan uni rekonstruksiya qilish ehtiyoji paydo bo‘ldi”, — deyiladi xabarda. Shu bois ushbu ko‘prikning Kichik halqa yo‘li bilan kesishgan joyida aylanma shaklidagi yo‘l o‘tkazgich qurish rejalashtirilgan. Uning uzunligi 519 metrdan 650 metrgacha, eni esa 23,2 metrdan 30 metrgacha bo‘lishi mo‘ljallangan.
Ta’kidlanishicha, “bu muhandislik yechimi avtotransportlarning ko‘prikka chiqishi va tushishini osonlashtiradi, yo‘l harakati xavfsizligini ta’minlaydi, shuningdek, bu yerdagi qulaylik yaqin atrofdagi ko‘chalarga ham ta’sir qilib, tirbandlik kamayishida muhim omil bo‘ladi”.
“Gazeta.uz”ning yozishicha, taqdimotga ko‘ra obyektni 22 oy ichida foydalanishga topshirish rejalashtirilgan.
Eslatib o‘tamiz, 2020-yilning mayida Toshkent shahridagi Yashnobod va Mirzo Ulug‘bek tumanlari, Mahtumquli, Temur Malik, Parkent va Ohangaron ko‘chalari tutashmasida qurilgan uch qavatli ko‘prik foydalanishga topshirilgan edi.
Izoh (0)