Toshkentdagi uch pog‘onali yo‘l Markaziy Osiyoda yagona emas

“O‘zbekiston 24” telekanalining “Axborot 24” informatsion dasturi 22-may soat 21:00 dagi sonida muxbir Shahlo Ergashevaning Toshkentda yangi ochilgan uch qavatli transport bog‘lamasi haqidagi reportaji efirga uzatildi. Reportaj davomida inshootni ta’riflarkan, muxbir, jumladan, shunday dedi: “Ushbu obyekt Markaziy Osiyoda uch qavatli bo‘lgan yagona transport inshootiga aylandi”.

Markaziy Osiyo aslida kattaroq, hatto Xitoyning bir qismini qamrab oladigan geografik tushuncha, biroq “O‘zbekiston 24” muxbirlari bunda, katta ehtimol bilan, O‘zbekistonga qo‘shni to‘rt mamlakat — Qozog‘iston, Qirg‘iziston, Tojikiston va Turkmanistonni nazarda tutgan. E’tiborlisi, Qirg‘izistondan tashqari qolgan uch mamlakatda uch qavatli yo‘llar allaqachon qurilib, foydalanishga topshirilgan va yangilarini qurish ishlari olib borilmoqda.

2016-yil avgustida Qozog‘istonning “janubiy poytaxti” — Olmaota shahrida o‘sha vaqtda tirbandliklardan eng ko‘p aziyat chekkan Sayin va Risqulov ko‘chalari kesishmasida uch qavatli transport bog‘lamasi foydalanishga topshirilgan edi. Bir qarashda u uch qavatliga o‘xshamaydi (lekin haqiqatan ham uch qavatli), boz ustiga 311 metrlik yo‘l o‘tkazgichi ham boshqacha.

Hozirda Olmaotaning xalq orasida “aeroport halqa”si deb nomlanuvchi Buxtarma ko‘chasi — G‘ulja yo‘li chorrahasida ko‘rinishi Toshkentdagi uch qavatli yo‘lni qariyb takrorlovchi transport inshooti qurilmoqda.

2017-yil yanvarida Turkmaniston poytaxti Ashxobod shahrida tonnellarga to‘la Andalib shohko‘chasining Gurbansulton eje ko‘chasi bilan kesishmasida uch qavatli yo‘l inshooti qurilgan.

U ko‘prik, uzunligi 380 metrga teng tonnel va aylanma chorrahadan iborat (va ko‘rinishidan Toshkentdagi uch qavatli yo‘lga o‘xshaydi, bitta farqi — aylanma yo‘l ikkinchi emas, uchinchi qavatda). “Turkman davlat xabarlari”ning yozishicha, inshoot 9 ballgacha bo‘lgan yerosti silkinishlariga chidamli.

2018-yil sentabrida Tojikiston poytaxti Dushanbeda, Nusratullo Maxsum va G‘ofurov ko‘chalari chorrahasida mamlakatdagi ilk uch qavatli transport inshooti qurilib, foydalanishga topshirilgan edi.

Obyekt qurilishi 2016-yil sentabrida boshlangan, loyiha uchun Yevropa tiklanish va taraqqiyot banki 35 million dollarlik kredit, 3 million dollar miqdorida texnik yordam ajratgan edi.

Dushanbeda 2020-yil bahorida ikkinchi uch qavatli chorraha foydalanishga topshirilishi kerak edi, biroq koronavirus pandemiyasi sabab foydalanishga deyarli tayyor inshootning to‘liq ochilishi noma’lum muddatga qoldirilgan.

“O‘zbekiston 24” telekanali atrofidagi gap-so‘zlar

Kuni kecha ijtimoiy tarmoqlarda “Oriat Dono” radiokanalining “Futbol plyus” dasturidan kesib olingan lavha tarqaldi. Unda, jumladan, dastur ishtirokchilari “O‘zbekiston 24” telekanalida berilayotgan reportajlar va haqiqiy hayot o‘rtasida farq borligini ta’kidlab, lavhalar xolisligi va haqqoniyligini shubha ostiga olgan edi.

Bu chiqish ijtimoiy tarmoq foydalanuvchilari tomonidan, asosan, olqishlandi, “O‘zbekiston 24” telekanalini ham o‘z ichiga oluvchi Milliy teleradiokompaniyasi rahbari Alisher Xadjayev esa ushbu holat yuzasidan bergan bayonotida “Futbol plyus” ishtirokchilarining ta’kidlarini “mutlaqo asossiz va noo‘rin tanqidiy fikrlar” deb atadi.

Jurnalist Hasan Toshxo‘jayev esa Facebook’dagi sahifasida chiqish qilib: “‘O‘zbekiston 24’ telekanali yolg‘on axborot tarqatmaydi. ‘O‘zbekiston 24’ telekanali haqiqatni gapiradi”, deb ta’kidladi. Uning bu posti qizg‘in bahs-munozaralarga sabab bo‘lgan.