Президент Шавкат Мирзиёев 31 май куни туризм, шаҳар инфратузилмаси ва саноат соҳаларидаги лойиҳалар борасида амалга оширилаётган ишлар тақдимоти билан танишди. Бу ҳақда давлат раҳбарининг матбуот хизмати хабар берди.
Тақдим этилган лойиҳалардан бири — Тошкент халқаро аэропортидан шаҳар марказига ўтишдаги кўприкни кенгайтиришга қаратилган. Ҳозирги йўл ўтказгич 1967 йилда қурилган ва 2008 йилда кенгайтирилган.
«Пойтахтимиз ривожланиши ва транспортлар сони ошиши билан уни реконструкция қилиш эҳтиёжи пайдо бўлди», — дейилади хабарда. Шу боис ушбу кўприкнинг Кичик ҳалқа йўли билан кесишган жойида айланма шаклидаги йўл ўтказгич қуриш режалаштирилган. Унинг узунлиги 519 метрдан 650 метргача, эни эса 23,2 метрдан 30 метргача бўлиши мўлжалланган.
Таъкидланишича, «бу муҳандислик ечими автотранспортларнинг кўприкка чиқиши ва тушишини осонлаштиради, йўл ҳаракати хавфсизлигини таъминлайди, шунингдек, бу ердаги қулайлик яқин атрофдаги кўчаларга ҳам таъсир қилиб, тирбандлик камайишида муҳим омил бўлади».
«Gazeta.uz»нинг ёзишича, тақдимотга кўра объектни 22 ой ичида фойдаланишга топшириш режалаштирилган.
Эслатиб ўтамиз, 2020 йилнинг майида Тошкент шаҳридаги Яшнобод ва Мирзо Улуғбек туманлари, Маҳтумқули, Темур Малик, Паркент ва Оҳангарон кўчалари туташмасида қурилган уч қаватли кўприк фойдаланишга топширилган эди.
Изоҳ (0)