AQSh Milliy xavfsizlik agentligi (NSA) Germaniya, Shvetsiya, Norvegiya va Fransiya siyosatchilarining muloqotlari to‘g‘risidagi ma’lumotlarni Daniyadan boshqa mamlakatlarga o‘tgan internet kabellari yordamida qo‘lga kiritgan. Bu haqda Daniyaning DR teleradiokompaniyasi tomonidan Yevropa nashrlari bilan birgalikda olib borilgan tekshiruvda aytilgan, deb yozadi Meduza.
Jurnalistlarning fikriga ko‘ra, kuzatuv, xususan, Germaniya kansleri Angela Merkel, mamlakat prezidenti Frank-Valter Shtaynmayer (o‘shanda tashqi ishlar vaziri bo‘lib ishlagan) va germaniyalik siyosatchi Per Shtaynbruk ustidan amalga oshirilgan. NSA tomonidan muloqotlari kuzatilgan siyosatchilarning aniq soni noma’lum.
NSA Daniyaning internet kabellari orqali o‘tadigan ma’lumotlardan foydalanish imkoniyatini Daniya Harbiy razvedka xizmati (FE) bilan hamkorlik orqali qo‘lga kiritgan.
2015-yildan beri razvedka xizmati NSA Yevropa siyosatchilariga josuslik qilish uchun FE bilan hamkorligidan foydalanayotganini bilar edi, ammo NSA bilan aloqalarni to‘xtatmaslikka qaror qildi.
Keyinchalik bu haqda Daniya Mudofaa vazirligiga ma’lumot yetib bordi. 2020-yilda vazirlik rahbari Trine Bramsen NSA’ni Yevropa siyosatchilariga josuslik qilishiga yo‘l qo‘ygani uchun FE’ni qattiq tanqid qildi. Shuningdek, Bramsen FE’ning bir qator rahbarlarini ishdan bo‘shatdi.
NSA Angela Merkel va Yevropa Ittifoqining boshqa siyosatchilariga qarshi josuslik qilgani haqida birinchi marta Edvard Snouden 2013-yilda ommaviy axborot vositalariga AQSh maxsus xizmatlarining butun dunyoni kuzatuvchi dasturlari haqida ma’lumot taqdim etganidan so‘ng ma’lum bo‘lgan.
Germaniya Merkelning NSA tomonidan kuzatuvi bo‘yicha boshlagan tergovi dalil yo‘qligi sababli 2015-yilda to‘xtatilgan.
Izoh (0)