Ryanair aviakompaniyasining Dublindan Krakovga ketayotgan samolyoti shoshilinch ravishda Berlinga qo‘ndi. Bu haqda Germaniya politsiyasiga asoslanib, Deutsche Welle xabar berdi.
Boeing 737 Germaniya poytaxtiga 30-may kuni Toshkent vaqti bilan soat 23:00 da qo‘ndi. Aeroportda laynerni huquq-tartibot organlari hamda favqulodda xizmatlar xodimlari kutib oldi. Yo‘lovchilar bagaji aerodromga tushirildi, itlar uni tekshirib chiqdi. Bortda 160 kishi bo‘lgani aytilmoqda. AFP telekanali xabariga ko‘ra, ekipajning o‘zi qo‘nishga ruxsat so‘ragan.
Telekanalning ma’lum qilishicha, qo‘nish uchun parvoz chog‘idagi favqulodda vaziyat sabab bo‘lgan, shundan so‘ng darhol unga Berlinga qo‘nishga ruxsat berilgan. Bild nashrining yozishicha, bunga samolyot minalashtirilgani haqidagi xabar sabab bo‘lgan.
Bortda portlovchi moslama borligi tasdiqlanmadi. Yo‘lovchilar bepul ovqat bilan ta’minlandi. Tekshiruvlardan so‘ng ular boshqa samolyotga o‘tirib, soat 5:00 atrofida Krakovga jo‘natildi.
Ryanair aniqlik kiritishicha, nemis dispetcherlari ekipajga tahdid borligi haqida xabar bergan. “Ryanair’ning FR1901 reysi bilan Dublindan Krakovga uchgan Ryanair ekipaji kecha Germaniyaning havo harakatini boshqarish tomonidan bortdagi xavfsizlikka tahdid to‘g‘risida ogohlantirildi. Kapitan kerakli protseduralarni bajarib, eng yaqin aeroportga, ya’ni Berlinga yo‘l oldi”, — dedi aviakompaniya. Samolyotdagi yo‘lovchilar manziliga, taxminan, sakkiz soat kech yetib borgan.
Irish Examiner ma’lumotlariga ko‘ra, bu Ryanair samolyotlarining so‘nggi kunlarda sodir bo‘layotgan navbatdagi majburiy qo‘nishidir. 29-may kuni laynerning hojatxonasidan bortda portlovchi moslama borligi haqida yozuv topilgandan so‘ng, Krakovdan Dublinga uchayotgan samolyot Londonga qo‘ngan.
Samolyotlarning favqulodda qo‘nishi haqidagi xabarlar Ryanair aviakompaniyasining parvozi bilan bog‘liq xalqaro mojaro fonida paydo bo‘lmoqda. 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qilgandi. Samolyot yo‘lovchilari orasida Nexta muxolifatchi Telegram kanali sobiq bosh muharriri Roman Protasevich bor edi, Belarusda unga qarshi bir qator jinoyat ishlari qo‘zg‘atilgan. Protasevich va uning sevgilisi — Rossiya fuqarosi Sofya Sapega aeroportda qo‘lga olingan.
Belarus rasmiylarining ma’lum qilishicha, Ryanair reysi bortida bomba borligi haqida Minsk aeroportiga Falastinning HAMAS harakati nomidan yuborilgan xabar kelib tushgan. HAMAS o‘zining bu xabarga aloqasi yo‘qligini aytdi.
Ryanair samolyotining favqulodda qo‘ndirilishidan so‘ng Yevropa mamlakatlari Belarusdan parvozlarni qabul qilishni rad eta boshladi, Yevropa aviakompaniyalari esa Belarus havo hududini kesib o‘tishdan bosh tortmoqda.
Fuqaro aviatsiyasi xalqaro tashkiloti Ryanair samolyotining Minskka majburiy qo‘nishi yuzasidan tekshiruv o‘tkazishini ma’lum qildi. Tashkilotning oraliq hisoboti 25-iyunda taqdim etilishi kutilmoqda.
Mavzuga doir:
Izoh (0)