Uzbekistan Airports O‘zbekistondagi barcha xalqaro aeroportlar bilan boshqaruv bo‘yicha shartnomalar imzoladi. Bu haqda kompaniya matbuot xizmati “Gazeta.uz”ga ma’lum qildi.
Xabarda aytilishicha, shu tariqa, Uzbekistan Airports barcha aeroportlarning yagona ijro etuvchi organiga aylandi.
Kompaniyaning yagona organ sifatida asosiy vazifalari barcha aeroportlarni rivojlantirish strategiyasini amalga oshirish, ularning faoliyatini uslubiy boshqarish va aeroport infratuzilmasini rivojlantirish loyihalarini amalga oshirish uchun moliyaviy oqimlarni to‘plash va yangi texnologiyalarni joriy etishdan iborat bo‘ladi.
“O‘zbekistonda aeroportlarni rivojlantirish uchun juda muhim qadam tashlandi — aeroportlarni yagona markazdan rivojlantirish uchun huquqiy asos yaratildi”, — degan Uzbekistan Airports boshqaruvi raisi Ra’no Jo‘rayeva.
Endi Uzbekistan Airports barcha xalqaro aeroportlarning boshqaruv kompaniyasi sifatida aeroportlarda ishlarni to‘liq yo‘lga qo‘yishi mumkin.
Eslatib o‘tamiz, 2021-yilning aprelida Shavkat Mirziyoyev Uzbekistan Airways hamda Uzbekistan Airports aksiyadorlik jamiyatlarini transformatsiya qilish chora-tadbirlari taqdimoti bilan tanishgandi. Taqdimotda Uzbekistan Airports tarkibida 11 ta aeroport borligi va ularning har biri mustaqil faoliyat yuritayotgani ta’kidlanib, mazkur aeroportlarni yagona boshqaruv organi tasarrufida birlashtirish taklif qilingandi.
Bundan avval Uzbekistan Airports Xalqaro aeroportlar kengashiga a’zo bo‘lgani haqida xabar berilgandi.
Izoh (0)