Uzbekistan Airports Ўзбекистондаги барча халқаро аэропортлар билан бошқарув бўйича шартномалар имзолади. Бу ҳақда компания матбуот хизмати «Gazeta.uz»га маълум қилди.
Хабарда айтилишича, шу тариқа, Uzbekistan Airports барча аэропортларнинг ягона ижро этувчи органига айланди.
Компаниянинг ягона орган сифатида асосий вазифалари барча аэропортларни ривожлантириш стратегиясини амалга ошириш, уларнинг фаолиятини услубий бошқариш ва аэропорт инфратузилмасини ривожлантириш лойиҳаларини амалга ошириш учун молиявий оқимларни тўплаш ва янги технологияларни жорий этишдан иборат бўлади.
«Ўзбекистонда аэропортларни ривожлантириш учун жуда муҳим қадам ташланди — аэропортларни ягона марказдан ривожлантириш учун ҳуқуқий асос яратилди», — деган Uzbekistan Airports бошқаруви раиси Раъно Жўраева.
Энди Uzbekistan Airports барча халқаро аэропортларнинг бошқарув компанияси сифатида аэропортларда ишларни тўлиқ йўлга қўйиши мумкин.
Эслатиб ўтамиз, 2021 йилнинг апрелида Шавкат Мирзиёев Uzbekistan Airways ҳамда Uzbekistan Airports акциядорлик жамиятларини трансформация қилиш чора-тадбирлари тақдимоти билан танишганди. Тақдимотда Uzbekistan Airports таркибида 11 та аэропорт борлиги ва уларнинг ҳар бири мустақил фаолият юритаётгани таъкидланиб, мазкур аэропортларни ягона бошқарув органи тасарруфида бирлаштириш таклиф қилинганди.
Бундан аввал Uzbekistan Airports Халқаро аэропортлар кенгашига аъзо бўлгани ҳақида хабар берилганди.
Изоҳ (0)