Samarqand viloyati Xalq ta’limi boshqarmasi Toyloq tumanidagi 59-sonli maktab direktorining o‘rinbosari o‘quvchilarning qarindoshlari tomonidan kaltaklangani to‘g‘risida tarqalgan xabarlarga munosabat bildirdi.
Ma’lum qilinishicha, 26-may kuni sodir bo‘lgan ushbu holatning kelib chiqishiga maktab direktori o‘rinbosari A.S.ning imtihonlarga kechikib kelgan o‘quvchilarga bergan tanbehi sabab bo‘lgan.
Uning o‘quvchilardan tartib-intizomni talab qilgani, imtihon jarayonlarida o‘z vaqtida ishtirok etishni so‘ragani 9-“A” sinf o‘quvchisi A.Sh. va uning ba’zi yaqinlariga yoqmagan. Zo‘ravon yigitlar maktabga bostirib kelib, direktor o‘rinbosarini kaltaklagan va unga jarohat yetkazgan.
Samarqand viloyati IIB axborot xizmatining ma’lum qilishicha, ushbu holat bo‘yicha 31-may kuni Toyloq tuman IIB huzuridagi tergov bo‘limi tomonidan M.Sh. va boshqalarga nisbatan Jinoyat kodeksining 277-moddasi (bezorilik) 2-qismi “b” bandi bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Ta’kidlanishicha, olgan jarohatlari tufayli bir kun davomida shifokorlarning nazoratida bo‘lgan A.S.ning ahvoli yaxshi.
Avvalroq Navoiyda o‘quvchi qizning onasi farzandidan maktabga formada kelishini so‘ragan o‘qituvchini kaltaklagani, Qashqadaryoda o‘quvchiga tanbeh bergan homilador o‘qituvchi kaltaklangani va ayol homila tushish xavfi bilan tug‘ruqxonaga yotqizilgani to‘g‘risida xabar berilgandi.
Izoh (0)