O‘zbekiston ilgari 2020-yilda rejalashtirilgan Markaziy Osiyo davlatlari rahbarlarining uchinchi maslahat uchrashuvi yuzma-yuz formatda o‘tkazilishiga umid qilmoqda. Bu haqda Prezident matbuot kotibi Sherzod Asadov 31-may, dushanba kuni o‘tkazilgan brifingda ma’lum qildi, deb yozmoqda “Gazeta.uz”.
Markaziy Osiyo davlatlari rahbarlarining navbatdagi uchinchi maslahat uchrashuvi 2020-yil avgustda Bishkekda bo‘lib o‘tishi kerak edi, keyin sammit kuzga ko‘chirildi, ammo koronavirus pandemiyasi sababli 2021-yilga qoldirilgandi. Keyinchalik O‘zbekiston TIV rahbari Abdulaziz Komilov mahalliy OAVga bergan intervyusida sammit 2021-yilda Turkmanistonda o‘tkazilishi mumkinligini ma’lum qildi.
“Bu yo‘nalishdagi ishlar davom ettirilmoqda. Ammo eng muhimi, biz ushbu uchrashuvning yuzma-yuz formatda o‘tishini ta’minlash uchun ish olib boryapmiz. Onlayn format ko‘zda tutilmagan”, — degan Sherzod Asadov uchinchi uchrashuvning ehtimoliy sanasi haqidagi savolga javoban.
Prezident matbuot kotibi pandemiya sharoiti hozirda navbatdagi uchrashuv joyi va sanasini aytish imkonini bermasligini ta’kidlagan.
“Biz sheriklarimiz bilan hamkorlikda bir yildan buyon navbatdagi uchrashuvga tayyorgarlik ko‘ryapmiz. Imzolash uchun keng va zalvorli hujjatlar to‘plami tayyorlanmoqda”, — deb qo‘shimcha qilgan u.
Eslatib o‘tamiz, Markaziy Osiyo davlat rahbarlarining maslahat uchrashuvlarini muntazam o‘tkazish tashabbusi O‘zbekiston Prezidenti Shavkat Mirziyoyev tomonidan 2017-yil sentabr oyida BMT Bosh Assambleyasining 72-sessiyasida ilgari surilgan edi. Bunday birinchi yig‘ilish 2018-yil mart oyida Qozog‘iston poytaxtida, ikkinchisi esa 2019-yil noyabrda Toshkentda o‘tkazilgan va o‘shanda uchinchi uchrashuvni Bishkekda o‘tkazishga qaror qilingandi.
Izoh (0)