Uzbekistan Airports aksiyadorlik jamiyati butun jahon aeroportlarini birlashtirgan Airports Council International (ACI) tashkilotiga rasman a’zo bo‘ldi, deya xabar bermoqda O‘zA.

Foto: “Daryo”

Ta’kidlanishicha, o‘zida 670 a’zoni birlashtirgan Xalqaro aeroportlar kengashi (ACI) 176 mamlakatdagi 1 ming 979 ta aeroportga xizmat ko‘rsatib kelmoqda. ACI, shuningdek, Xalqaro havo transporti assotsiatsiyasi (IATA), Xalqaro fuqaro aviatsiyasi tashkiloti (ICAO), Fuqaro aviatsiyasida aeronavigatsiya xizmatini ko‘rsatish tashkiloti (CANSO) bilan ham hamkorlik qilib keladi.

Uzbekistan Airports rahbariyati ACI bilan boshlangan onlayn muloqotlar 2020-yilning oxirlarida nihoyasiga yetgan.

Muloqotda O‘zbekistonning barcha xalqaro aeroportlarida parvozlar xavfsizligini ta’minlash, yo‘lovchilarga sifatli xizmat ko‘rsatish, havo darvozalarini dunyo talablari darajasida modernizatsiya qilish, parvozlar ko‘lamini kengaytirish masalalariga e’tibor qaratildi. O‘zbekiston tomonidan tashkilotga taqdim qilingan hujjatlar bir ovozdan ma’qullandi. A’zolik talablarini bajarish va galdagi vazifalar yuzasidan fikrlar tinglangan. O‘z navbatida kelgusi rejalar ham belgilab olingan.

Qayd etilishicha, a’zolik avvalo xizmatlar ishonchliligini kafolatlaydi. Qolaversa, mamlakatda havo transporti tizimini tubdan isloh qilish, soha faoliyatini xalqaro me’yorlarga tenglashtirish, sayyohlikni rivojlantirish, investitsiyalar oqimini jadallashtirishda ACI xizmatlariga tayaniladi.

Avvalroq O‘zbekiston 7 davlat bilan xalqaro aviaqatnovlar bo‘yicha cheklov muddatini uzaytirgani, O‘zbekistonda 2021-yilda avia va temiryo‘l chiptalariga 30 foiz chegirma berilishi hamda O‘zbekiston yana bitta Boeing-787-8 samolyotini xarid qilishi haqida xabar berilgandi.