Samarqand avtomobil zavodi va “SariarkaAvtoProm” Qozog‘istonda past polli “SamAvto” SAZ LE60 avtobuslarini ishlab chiqarish bo‘yicha bitim imzoladi, deb xabar beradi “Podrobno”.
Seriyali ishlab chiqarish jarayonlari iyunda boshlanadi, yil oxiriga borib 200 nusxa avtobus konveyerdan chiqadi. Shu bilan birga, 2022-yilga borib, ishlab chiqarish quvvatini 1000 nusxaga yetkazish rejalashtirilgan.
“Hamyonbop yo‘lovchi texnikalarini ishlab chiqarish orqali mamlakatdagi avtobus parklarining eskirishi bilan bog‘liq muammoni yechish niyatidamiz. Ishlab chiqariladigan mahsulotni tanlashda biz texnik tavsifidan kelib chiqyapmiz — Euro V ekologik klassi hamda yo‘lovchilar xavfsizligi muhim. SAZ LE60 avtobusi ushbu talablarning barchasiga javob beradi, shunday ekan uning Qozog‘iston yo‘nalishlarida paydo bo‘lishini kutamiz”, — deydi “Allur” AJ prezidenti Oksana Xolstinina.
Shu bilan birga, “SariarkaAvtoProm” zavodi Samarqand avtomobil zavodining SAZ avtobuslari jamlanmasini Qozog‘istonning istalgan viloyati talablaridan kelib chiqib taqdim etishi mumkin.
“Biz O‘zbekistonda loyihalashtirilgan ‘SamAvto’ SAZ LE60 avtobuslariga bo‘lgan qiziqishni yuqori baholaymiz. Ushbu avtobus Qozog‘istonning janubiy viloyatlaridagi iqlim sharoitlarida moslashish jarayonidan o‘tdi, endi esa mamlakat shimoliga moslashtiriladi. Umid qilamanki, Qozog‘iston aholisi uning qulayligi, xavfsizligi va uzoq muddat xizmat qilishi kabi afzalliklarini qadrlaydi”, — deydi SamAuto bosh direktori O‘lmas Yo‘ldoshev.
Ma’lumot uchun, 1999-yilda tashkil topgan SamAvto zavodi metallni bichishdan boshlab to tayyor mahsulotni sinashgacha bo‘lgan butun siklga ega yirik mahalliy korxonalardan biri hisoblanadi. Ishlab chiqarish majmuasi Germaniya, Italiya va Yaponiyadan keltirilgan dastgohlar bilan jihozlangan.
Avvalroq Bishkek O‘zbekistondan gazda harakatlanadigan kamida 350 ta avtobus sotib olishi to‘g‘risida xabar berilgandi.
Izoh (0)